As Xornadas Horizonte Eurorrexional definen unha folla de ruta común para reforzar o I+D+i entre Galicia e o Norte de Portugal
As Xornadas Horizonte Eurorrexional Galicia-Norte de Portugal organizadas en Santiago pola Fundación CEER consolidaron un paso decisivo cara á creación dun espazo universitario eurorrexional máis integrado. O encontro inaugurouno Inês Gusmãn, directora do CEER, xunto con Pilar Bermejo, vicerreitora de Política Científica da USC, quen destacaron a importancia estratéxica da cooperación eurorrexional nun contexto europeo crecente e altamente competitivo.
As persoas responsables dos Servizos de Apoio á Investigación e á Innovación de cada universidade ofreceron na xornada unha visión detallada da súa estrutura, recursos e funcionamento, nun intercambio que permitiu situar o punto de partida común e identificar similitudes e diferenzas entre os modelos organizativos das institucións galegas e portuguesas. Xa no traballo por mesas, os equipos analizaron de forma colaborativa necesidades, problemáticas e oportunidades de mellora, sendo este un espazo de diálogo directo e operativo entre os profesionais responsables da xestión da investigación nas dúas marxes do Miño e o persoal da Fundación CEER.
Necesidades compartidas para un ecosistema máis sólido
Algunhas das necesidades claves expostas polos Servizos Universitarios de Apoio á Investigación e á Innovación para mellorar a súa eficacia e reforzar o papel estratéxico das universidades na captación de fondos internacionais teñen que ver co coñecemento en profundidade das áreas de I+D de as persoas que traballan en cada universidade da Eurorrexión, mellorando a interconexión e evitando duplicidades.
Potenciar a visibilidade interna e externa dos servizos, facilitando a comunicación, a coordinación e a participación en proxectos conxuntos; impulsar intercambios de persoal e formacións conxuntas, co obxectivo de homoxeneizar procesos e fortalecer capacidades profesionais, e crear un directorio eurorrexional de xestores, que simplifique o contacto e o traballo colaborativo entre institucións foron outras cuestións apuntadas por este persoal, que considera tamén necesario compartir datos e estatísticas estruturadas por ámbitos de investigación ou programas.
Folla de ruta eurorrexional para derrubar barreiras
A partir de todas estas achegas, xunto coa identificación de problemas recorrentes e boas prácticas existentes, elaborouse unha batería de propostas comúns. A Fundación CEER encargarase agora de sintetizar este traballo na creación dunha Folla de Ruta Eurorrexional, que orientará e promoverá accións conxuntas destinadas a eliminar barreiras administrativas, mellorar o coñecemento mutuo e a coordinación e maximizar o impacto da investigación universitaria galego-portuguesa.
Ao longo da xornada quedou patente o rol do CEER como catalizador do ecosistema universitario da Eurorrexión, favorecendo a cooperación académica e científica entre Galicia e o Norte de Portugal. A vontade común expresada apunta a un futuro marcado por maior integración, eficiencia e capacidade de influencia nos principais programas europeos de I+D+i, así como a expansión de oportunidades coa busca de novas oportunidades de enfoque e financiamento.
Logo do encontro, a organización conclúe que “Galicia e o Norte de Portugal están a construír, de maneira coordinada, un espazo universitario conxunto máis sólido, preparado e con maior capacidade de resposta fronte aos desafíos europeos actuais e futuros”.