O deporte universitario como modelo de cooperación transfronteiriza na celebración dos XXVII Xogos Galaico Durienses

Os XXVII Xogos Galaico Durienses porán en competición durante dous días 200 deportistas pertencentes ás seis universidades públicas da Eurorrexión ­–Universidades de Santiago de Compostela, Trás-os-Montes e Alto Douro, Vigo, Minho, Porto e A Coruña­– que envían cadansúa delegación formada por 33 deportistas e técnicos nas modalidades de baloncesto, fútbol sala e xadrez. Esta cita deportiva dará comezo en Tomiño o 19 ás 10.00 horas de España co seminario ‘O deporte universitario na Eurorrexión Galicia-Norte de Portugal. Liñas estratéxicas, orientacións e principais desafíos en torno á Estratexia Europa 2020’ no que participarán representantes dos servizos e titulacións deportivas das seis universidades xunto cos das corporacións municipais de Tomiño e Vila Nova da Cerveira. Xa ás 13.00 horas terá lugar a inauguración oficial dos xogos no mesmo Auditorio de Goián, en Tomiño, para dar paso pola tarde ás competicións simultáneas de fútbol sala, baloncesto e xadrez, que continuarán na mañá do día 20 ata as 14.00 horas, cando se clausurará o evento no Pavillón Municipal de Vila Nova da Cerveira coa asistencia do secretario de Estado do Desporto e Juventude de Portugal, o secretario xeral de Deportes da Xunta de Galicia, o presidente da Fundación CEER e reitor da Universidade do Minho, a alcaldesa de Tomiño e o presidente da Cámara Municipal de Vila Nova da Cerveira. A XXVII edición dos Xogos Galaico-Durienses está organizada pola Fundación Centro de Estudios Eurorrexionais Galicia-Norte de Portugal (CEER) en colaboración coa Agrupación Europea de Cooperación Territorial, ambas entidades dedicadas á cooperación transfronteriza Galicia-Norte de Portugal, xunto coas seis universidades públicas de Galicia e do Norte de Portugal, e patrocinado polo grupo galego Gadisa.