O reitor da Universidade de Santiago, Antonio López, inaugura o martes 11, ás 9.00 horas na Facultade de Dereito, a xornada ‘Globalización do traballo e fiscalidade: marco legal, cuestións pendentes e tendencias emerxentes’, organizada pola USC e a Universidad Complutense de Madrid.
Logo da apertura, intervirá o catedrático de Dereito Financeiro e Tributario da USC César García Novoa coa conferencia A fiscalidade dos artistas, deportistas e entretedores. A partir de aí, a xornada estrutúrase en diversas mesas de debate sobre a mobilidad dos traballadores con residencia española na LIRPF, o réxime fiscal non residentes que se desprazan a España, o tratamento fiscal dos traballadores transfronteirizos e, por último, o traballo a distancia e outros modelos do mundo globalizado.
O encontro, no que participa persoal experto de todo o Estado, clausurarase ás 19.30 horas nun acto no que intervirá Cristina García-Herrera Blanco, directora de Estudos do Instituto de Estudos Fiscais.
A xornada desenvólvese no marco do proxecto ‘O réxime fiscal da mobilidade internacional de traballadores’ concedido polo Instituto de Estudos Fiscais do Ministerio de Facenda e forma parte do conxunto de actividades da Jean Monnet Chair EUGreenTax.