Comeza a XVI edición da Conferencia Electrónica sobre Química Orgánica Sintética

O 1 de novembro arranca a décimo sexta edición da Electronic Conference on Synthetic Organic Chemistry, organizado desde a Facultade de Ciencias de Lugo (baixo a coordinación dos profesores Julio Seijas Vázquez e Pilar Vázquez Tato), en colaboración coa Molecular Diversity Preservation International (MDPI). A actividade desenvolverase integramente na rede durante todo o mes de novembro, e estrutúrase mediante listas de correo a partir das 121 comunicacións aceptadas polo comité organizador e chegadas dos cinco continentes. Os contidos desta edición organízanse en cinco áreas: síntese orgánica xeral; química dos produtos bioorgánicos, medicinais e naturais; síntese asistida por microondas, química dos polímeros e supramolecular; e unha quinta área centrada na relación entre a química orgánica e a informática. Todas as achegas a este congreso inclúense despois no Chemical Abstracts, co obxectivo de que todas as persoas interesadas poidan dispoñer libremente dos seus contidos. "No seu momento fomos pioneiros na posta en marcha dun congreso exclusivamente electrónico, e na actualidade seguimos mantendo unha alta participación, mentres que outras iniciativas similares foron desaparecendo", indica Julio Seijas, quen destaca "as vantaxes de poder reunir durante un mes nun mesmo foro a expertos de todo o mundo cun custo de organización case testemuñal". No comité científico da conferencia participan expertos de España (da USC, Universidade da Coruña e Universidad de Sevilla), Portugal, Francia, Dinamarca, Italia, Bélxica, Lituania, Exipto, Illas Mauricio, Brasil, Emiratos Árabes e Estados Unidos. Este congreso é organizado pola USC desde a súa sexta edición, no ano 2002, e conta co apoio da Vicerreitoría de Coordinación e Planificación do Campus de Lugo.