A Fundación Repsol presenta á comunidade universitaria da USC o seu Fondo de Emprendedores
O Fondo de Emprendedores da Fundación Repsol acaba de ser presentado na USC, nunha sesión presidida polo reitor Juan Casares na Escola Técnica Superior de Enxeñaría de Santiago na que se explicaron os detalles deste programa de axudas dirixido a emprendedores que constituísen ou teñan intención de constituír unha empresa no ámbito da eficiencia enerxética. En Santiago o acto contou coa presenza ademais do reitor da USC, do director da refinería de Repsol na Coruña, Felipe Llamas; o director da Área de Enerxía e Medio Ambiente da Fundación Repsol, Manuel Bravo López; o director da Área de Valorización Transferencia e Emprendemento da USC, José Luis Villaverde; e o subdirector da ETSE, Francisco Omil Prieto. Pola tarde, é a quenda do Campus de Lugo onde tamén se presentará este programa ás 16.30 horas no Edificio Cactus, coa participación de José Luis Villaverde; o director de Enxeñería e Desenvolvemento da refinería de Repsol na Coruña, Ricardo Santos Rodríguez; Manuel Bravo López; e o catedrático de Química Orgánica e coordinador da RIAIDT no Campus de Lugo, Julio A. Seijas Álvarez. O Fondo Este fondo ten como obxectivo promover proxectos empresariais no campo da eficiencia enerxética e realizar un labor de apoio para o seu desenvolvemento, xa que todos os proxectos seleccionados contarán coas capacidades e infraestruturas tecnolóxicas do Grupo Repsol, que lles ofrecerá asesoramento tecnolóxico, legal e empresarial, ademais dunha dotación de entre 6.000 e 12.000 euros mensuais durante o período de incubación e axuda para a busca de financiamento na fase de desenvolvemento.
Un comité de avaliación constituído por expertos neste ámbito, e posteriormente un xurado formado por persoas de recoñecido prestixio no sector enerxético e empresarial, serán os encargados de seleccionar os proxectos gañadores. O prazo de presentación de propostas finaliza o próximo 16 de novembro.