A Fundación Repsol presenta á comunidade universitaria o seu Fondo de Emprendedores
O xoves 25 o Campus Vida de Santiago e o Campus de Lugo acollerán senllas presentacións á comunidade universitaria do Fondo de Emprendedores da Fundación Repsol, un programa de axudas dirixido a emprendedores que constituísen ou teñan intención de constituír unha empresa no ámbito da eficiencia enerxética.
En Santiago o acto desenvolverase a partir das 12.00 horas no Salón de Actos da Escola Técnica Superior de Enxeñería do Campus Vida (ETSE), e contará coa presenza do reitor da USC, Juan Casares; o director da refinería de Repsol na Coruña, Felipe Llamas; o director da Área de Enerxía e Medio Ambiente da Fundación Repsol, Manuel Bravo López; o director da Área de Valorización Transferencia e Emprendemento da USC, José Luis Villaverde; e o subdirector da ETSE, Francisco Omil Prieto.
No Campus de Lugo a presentación será ás 16.30 horas, coa participación de José Luis Villaverde; o director de Enxeñería e Desenvolvemento da refinería de Repsol na Coruña, Ricardo Santos Rodríguez; Manuel Bravo López; e o catedrático de Química Orgánica e coordinador da RIAIDT no Campus de Lugo, Julio A. Seijas Álvarez.
Este fondo ten como obxectivo promover proxectos empresariais no campo da eficiencia enerxética e realizar un labor de apoio para o seu desenvolvemento, xa que todos os proxectos seleccionados contarán coas capacidades e infraestruturas tecnolóxicas do Grupo Repsol, que lles ofrecerá asesoramento tecnolóxico, legal e empresarial, ademais dunha dotación de entre 6.000 e 12.000 euros mensuais durante o período de incubación e axuda para a busca de financiamento na fase de desenvolvemento.
Un comité de avaliación constituído por expertos neste ámbito, e posteriormente un xurado formado por persoas de recoñecido prestixio no sector enerxético e empresarial, serán os encargados de seleccionar os proxectos gañadores. O prazo de presentación de propostas finaliza o próximo 16 de novembro.