O creador do concepto de pegada ecolóxica visita a USC

O grupo de investigación de Enxeñaría e xestión de procesos e produtos sostibles que coordina Enrique Roca trae este xoves a Santiago ao profesor Mathis Wackernagel, creador xunto con William Rees do concepto de pegada ecolóxica, un indicador de sustentabilidade que representa os custes ecolóxicos dun determinado modo de vida. O relatorio, organizado en colaboración co Plan de Desenvolvemento Sostible da USC, leva por título ‘Máis alá do carbón: como ter éxito nun mundo de recursos limitados. Unha perspectiva da pegada ecolóxica para as empresas’ e terá lugar este xoves 23 ás ás 10.00h no Salón de Actos da Escola Técnica Superior de Enxeñaría, tras ser recibido polo reitor Juan Casares. Wackernagel, na actualidade presidente da Global Footprint Network, traballou en temas de sustentabilidade para axencias gobernamentais, ONGs e empresas de todos os continentes. Entre os premios acadados figuran o 2011 Zayed International Prize for the Environment, o 2007 Skoll Award for Soxial Entrepreneurship, o 2006 WWF Award for Conservation Merit e o 2005 Herman Daly Award of US Society for Ecological Economics. Lectura de tese O profesor Wackernagel formará parte do tribunal da tese de doutoramento ’Desenvolvemento e integración de ferramentas de avaliación ambiental para o ecodeseño de procesos e produtos’& #160;que a investigadora da USC Marta Herva defenderá para optar ao grao de doutor na modalidade de Doutoramento Europeo. O traballo ten dous obxectivos principais como son o desenvolvemento de ferramentas de avaliación ambiental simplificadas e adaptadas para a súa aplicación sistemática en sistemas produtivos e a aplicación de metodoloxías de integración que permitan aplicar estas ferramentas de forma conxunta ao ecodeseño de procesos e produtos.