Estudantes de catorce países inician o vindeiro luns na USC a Escola de Verán sobre tecnoloxías innovadoras para o tratamento de augas residuais urbanas

O reitor Juan Casares inaugurará o vindeiro luns 5 a Escola de Verán ‘A depuradora do século XXI: tecnoloxías innovadoras para o tratamento de augas residuais urbanas’ no que participan 24 estudantes de doutoramento procedentes de catorce países de Latinoamérica, África do norte, Oriente Medio, Europa central e occidental. O acto inaugural do curso, que tenta estudar as tecnoloxías emerxentes dentro do campo do tratamento das augas residuais urbanas, celebrarase o luns 5 a partir das 8:50 horas no Salón de Actos da Escola Técnica Superior de Enxeñaría da USC (ETSE). Logo da inauguración, Manuel Mariño (World Bank) e Luis Larrea (Universidade de Navarra), presentan os dous primeiros relatorios do encontro, estando abertas ambas as dúas intervencións ao público en xeral. O Grupo de Enxeñaría Ambiental e Bioprocesos da USC é o organizador desta proposta formativa que se vai desenvolver nas súas instalacións na ETSE. Nelas o grupo dispón dunha planta piloto dotada con equipos que reproducen os procesos industriais a estudar, así como con laboratorio orientados á análise de augas e á ecoloxía microbiana.