O posgrao oficial centrou unha xuntanza con decanos e directores de centro

O reitor da USC, Senén Barro, e o vicerreitor de Oferta Docente e Espazo Europeo de Educación Superior, Máximo Pló, mantiveron este luns 5 un encontro con decanos e directores de centro para informarlle de diversos aspectos relacionados co posgrao oficial.
Na xuntanza expúxoselles os criterios para a aprobación de Programas Oficiais de Posgrao (POP) a implantar no curso 2008-2009 que, segundo explicou o vicerreitor, seguen a ser os de oportunidade e calidade na elaboración da oferta. Deste xeito, a oferta deberá cubrir as cinco grandes áreas de coñecemento e os dous campus da USC e ter en conta tanto criterios estratéxicos para a institución como de optimización dos recursos existentes, de pertinencia socioeconómica para Galicia e de oportunidade.
O seguinte dos puntos abordados foi a proposta do calendario para a aprobación dos POP da USC ao tempo que se lles avanzou aos decanos e directores o desenvolvemento do regulamento dos estudos oficiais de posgrao en relación cos órganos responsables da súa elaboración, a súa tramitación, profesorado e matrícula a tempo parcial.
A orde do día deste encontro incluíu tamén a análise dun documento de traballo do Ministerio de Educación e Ciencia sobre ‘Materias Básicas por Ramas’ e que representa un anexo do documento de Directrices para a elaboración de títulos universitarios de Grao e Máster.