Asaltan tres facultades da USC, provocando a rotura de varias cristaleiras

As facultades de Filoloxía e Ciencias da Comunicación e a Escola Técnica Superior de Enxeñaría sufriron importantes destrozos nas súas instalacións durante a pasada noite. Uns descoñecidos romperon varias cristaleiras das portas principais dos centros, causando desperfectos por un importe superior aos 6.000 euros.

O asalto aos centros foi detectado de madrugada, cando a patrulla de vixilancia da USC comprobou que as cristaleiras foran rotas con bolas de aceiro. Este feito púxose inmediatamente en coñecemento da Policía Nacional que acudiu tanto ás instalacións do Campus Norte coma do Campus Sur. Os responsables da Universidade formalizaron a denuncia hoxe pola mañá na comisaría, unha vez que se comprobou que non se producira ningún roubo nos centros afectados.

Os propios vixiantes detectaron, tamén durante esta pasada noite, varias pancartas nos campus universitarios en relación ao conflicto laboral que manteñen os traballadores da empresa de seguridade que presta o servizo á USC. Neste mesmo marco de protestas, unha ducia de persoas ocuparon hoxe pola mañá o despacho do xerente da Universidade durante case dúas horas.