O Plan Corresponsables USC amplíase ata o mes de marzo con novas actividades físico-deportivas

A iniciativa Corresponsables USC desenvolveu entre novembro e decembro de 2022 un intenso programa que levou a unha vintena de localidades galegas case un cento de grupos de actividades físico-deportivas gratuítas para a rapazada de ate 16 anos. Con preto de 2.600 participantes neste primeiro período de execución, o programa superou con moito as previsións iniciais e encara unha nova etapa que continuará a espallar polo territorio galego propostas de vida activa e hábitos saudables.

Algunhas das novas actividades que se ofrecerán ata o mes de marzo abriron xa o seu  prazo de inscrición. É o caso das xornadas de mutiaventura corresponsable en Viveiro, ou as de iniciación aos deportes alternativos e o multideporte en Compostela. Tamén é posible inscribirse nos obradoiros de danzas do mundo en Santiago e nas clases  maxistrais de hip-hop que Dani Suárez, campión estatal de Free Style en 2022, impartirá en Lugo. O abano de propostas activas inclúe ademais ioga, judo, xogos tradicionais, sesións de psicomotricidade e movemento na Aula Hospitalaria do CHUS e a oportunidade de descubrir en familia o ‘Barco Dragón’, unha modalidade de piragüismo de orixe chinesa con máis de 2.000 anos de antigüidade.

A estas sumaranse nos próximos días outras actividades que buscan servir de apoio específico ás  necesidades de conciliación das familias e prestar atención tamén a outros eidos de actuación relacionados coa creación de emprego, a dignificación e recoñecemento da experiencia profesional de coidados, ou a sensibilización en materia de corresponsabilidade. A totalidade da programación, así como o rexistro para participar nas diferentes actividades, estará dispoñible na web do proxecto.

Iniciativa pioneira na aprendizaxe corresponsable do coidado

O programa Corresponsables naceu ao abeiro dun convenio asinado polas tres universidades públicas galegas coa Vicepresidencia Segunda e Consellaría de Presidencia, Xustiza e Deporte a través da Secretaría Xeral para o Deporte da Xunta de Galicia, co apoio da Consellaría de Promoción do Emprego e Igualdade e do Ministerio de Igualdade. O seu fin é deseñar sistemas integrais de coidado dende unha perspectiva de xénero, interseccional e de dereitos humanos que promovan a corresponsabilidade entre mulleres e homes.

Entre as actividades desenvolvidas pola USC neste marco destacan, polo seu carácter pioneiro e polo elevado número de participantes que involucraron, os 66 obradoiros de primeiros auxilios ofrecidos no mes de decembro. 1170 persoas entre os 6 e os 16 anos de idade tomaron parte nestes talleres gratuítos de carácter práctico encamiñados á súa aprendizaxe e adestramento na reanimación cardiopulmonar, na cadea de supervivencia e no uso do desfibrilador externo semiautomático, que se desenvolveron nas localidades de Ames, Boiro, Brión, Friol, Lugo, Negreira, Monterroso, Santiago e Vedra.

A este respecto, o delegado do reitor para o Deporte, Javier Rico, subliñou “a extraordinaria resposta das familias, o que da conta de que este tipo de iniciativas poden contribuír a mellorar a conciliación ao tempo que promoven que nenos e nenas adquiran e consoliden dun estilo de vida activo e saudable”.

Amplo espectro xeográfico e conexión co tecido deportivo galego

Ames, A Baña, Boiro, Brión, Dumbría, Friol, Lugo, Mazaricos, Monterroso, Muros, Negreira, Noia, Outes, Padrón, A Pobra do Caramiñal, Porto do Son, Santa Comba, Santiago de Compostela, Vedra e Viveiro foron as 20 localidades ás que chegou Corresponsables USC nesta primeira etapa, no que supuxo “un grande esforzo de xestión da institución para espallar polo territorio galego as distintas accións formativas”,  apuntou Javier Rico.

Nelas cómpre salientar ademais a participación de numerosas escolas e entidades deportivas froito das sinerxías que a USC fomentou a comezos de curso a través de diversas xuntanzas co tecido asociativo de Lugo e Santiago no eido deportivo.