O Grupo Operativo BIO_MARTERRA levará a cabo o xoves 24 de abril, entre as 11.00 e as 13.00 horas, unha xornada divulgativa dentro do marco do proxecto 'Efecto da aplicación de bioestimulantes elaborados con algas a estreses abióticos e bióticos en variedades autóctonas de horta, pataca e viña'. Este consorcio nace en 2023 co fin de producir bioestimulantes máis respectuosos co medio ambiente a partir de descartes de algas mariñas nunha clara aposta pola economía circular. Os principais retos do proxecto sitúanse na elaboración e produción dos bioestimulates a escala comercial, a identificación de cultivos susceptibles de ser estimulados, e todos os parámetros relativos á dosificación (dose, método de aplicación, e frecuencia).
Ao longo da xornada, representantes das diferentes entidades do Grupo Operativo presentarán os resultados obtidos ata a data na validación experimental destes bioestimulantes fronte a estreses bióticos —como o mildiu— e abióticos —como a secura— en condicións de laboratorio e de campo. Os efectos son avaliados en cultivos de interese para Galicia, como son a vide, a pataca, ou o pemento. Ademais, durante o evento tamén haberá unha degustación de preparados de algas mariñas, cortesía da empresa promotora do proxecto. A xornada é gratuíta, terá lugar en formato presencial con capacidade do espazo limitada, e está dirixida a profesionais da agricultura, investigación, tecnoloxía, administración, e o público xeral.
O consorcio BIO_MARTERRA está formado por un equipo multidisciplinar composto pola Unidade de xestión de residuos e fertilización do grupo Agronomía da Universidade de Santiago de Compostela, a empresa produtora de algas, PORTO-MUIÑOS S.L., o grupo de investigación VIOR da Misión Biolóxica de Galicia (MBG-CSIC), a Fundación Empresa-Universidade Galega (FEUGA), Avelino Santana García e, como entidades cooperantes, o Centro Investigacións Agrarias Mabegondo (CIAM-Agacal) e Horta dá Lousa.
O proxecto BIO_MARTERRA está financiado polas axudas para a execución de proxectos innovadores dos grupos operativos da Asociación Europea da Innovación (AEI), cofinanciadas co Fondo Europeo Agrícola de Desenvolvemento Rural (FEADER) no marco do Plan estratéxico da política agraria común (PEPAC) 2023-2027. A Consellaría do Medio Rural é o órgano da Administración galega ao cal lle corresponde propoñer e executar as directrices xerais no ámbito rural e engloba as competencias en materia de agricultura, gandería, desenvolvemento rural e ordenación comarcal, estruturas rurais, industrias agroalimentarias e forestais, montes, prevención e defensa dos incendios forestais. O proxecto conta cun orzamento total de 179.634,83 euros.