A Asociación de Amigos do Museo de Historia Natural da Universidade de Santiago de Compostela organiza o Concurso Nadal con sentidiño co que invitamos a todas as persoas a gozar das festas de forma responsable e respectuosa co medio ambiente.
Obxectivo
O obxectivo principal deste concurso é a elaboración de adornos para a árbore de nadal que a Asociación ten no MHN. Teredes que facer animais ou plantas coa técnica de papel pregado ou papiroflexia: dinosauros, baleas, insectos, aves, peixes, caracois, planetas, árbores, cogomelos, flores... Así teremos unha árbore única, chea de natureza e feita a man, con moito agarimo na que colaborarán cativos e maiores.
Modalidades
- Individual: os participantes presentarán unha obra orixinal de forma individual xunto co nome proposto para ela. Cada concursante so poderá presentar como máximo dúas obras que serán valoradas de xeito individual. O tamaño será libre, en calquera caso, non superior a 20x20 cm.
Categorías:
- Cativos: Ata 8 anos
- Mocidade: De 9 a 14 anos
- Xeral: Maiores de 15 anos
- Colectiva: presentarán unha obra orixinal dunha recreación dunha escena natural (por exemplo: fondo mariño, selva, sabana, fraga...) realizada conxuntamente polo alumnado da aula ou do colectivo de que se trate. O colectivo entregará o conxunto que terá un lema ou nome proposto para a súa descrición. O tamaño será libre pero non superior a unha cartulina grande.
Técnica libre
Premiarase a orixinalidade, presentación e calidade.
Premios
- Modalidade individual: Dous premios por categoría, consistentes en diplomas e agasallos (xogos e libros).
-
Modalidade colectiva: Primeiro premio cun diploma e agasallo colectivo; segundo premio cun diploma e unha invitación a un obradoiro do museo.
Aceptaranse dous traballos por participante individual, pero só se poderá levar un premio por persoa.
Prazos e datas clave
- Prazo de presentación: Ata o 12 de decembro no Museo de Historia Natural.
- Fallo e entrega de premios: 16 de decembro, ás 18:00 h.
As obras estarán expostas durante o Nadal e poderán ser retiradas a partir do 8 de xaneiro de 2026. De non retirarse, pasarán a ser propiedade da Asociación de Amigos do Museo.
Consulta as bases completas e anímate a participar!
