A ETSE convértese no primeiro centro docente e investigador da USC que obtén a certificación OHSAS18001

A Escola Técnica Superior de Enxeñaría (ETSE) é o primeiro centro docente e investigador da USC que obtén a certificación OHSAS18001 sobre seguridade e saúde laboral de Aenor. Este centro compostelán recibiu a certificación nun acto celebrado este martes 19 na propia Escola baixo a presidencia do reitor Juan Casares e coa participación ademais da vicerreitora de Responsabilidade Social e Calidade, Benita Silva; do director da ETSE, Juan Lema; do director comercial de Aenor, José Rodríguez Coello; e do director do Departamento de Enxeñaría Química, Gumersindo Feijoo. Esta certificación “ratifica que estamos cambiando a nosa mentalidade respecto da seguridade laboral” subliñou Juan Lema, para quen a OHSAS18001 é un “froito moi positivo” que ratifica á ETSE como un centro activo e dinámico. Ademais, o selo entregado este martes á ETSE “pon en valor a confianza sobre o que se fai” indicou José Rodríguez Coello e a través do que a USC dá un novo chanzo no exercicio da súa responsabilidade. Concluíndo a sesión, o reitor Juan Casares salientou a importancia de que un grupo pequeno de universitarios teña a capacidade de modificar o comportamento de toda unha institución como a Universidade compostelá e asegurou, neste senso, que “ a ETSE marca unha vez máis o rumbo na USC”. A certificación A Escola Técnica Superior de Enxeñaría ­–no ámbito docente– e, especificamente, o Departamento de Enxeñaría Química –no apartado relativo a laboratorios de investigación– fixeron no último ano e medio unha serie de accións encamiñadas a obter a certificación OHSAS 18001 que avala os procedementos de seguridade e saúde laboral. O modelo da especificación OHSAS ‘Occupational Health and Safety Assessment Systems’ foi deseñada por un grupo internacional de entidades de certificación e de normalización co obxecto de que as empresas dispuxesen dun método recoñecido para que os seus sistemas de xestión puidesen ser avaliados e certificados. Trátase dunha especificación que require de políticas e procedementos moi estritos, ademais de ter un alto grao de compatibilidade coas ISO 9001 de Calidade e ISO 14001 de Medio Ambiente, que xa ten certificadas a propia USC. No relativo ao campo investigador e particularmente aos laboratorios do centro, a Escola traballou no establecemento dun procedemento documentado para a información dos alumnos, con referencia á avaliación de riscos do laboratorio e á autoprotección, ademais de establecer normas e fichas de seguridade ou a inclusión de contidos de seguridade nas prácticas, entre outras medidas. No ámbito específico de seguridade e saúde no traballo, logo da presentación e integración dun plan de acción específico no Plan de Calidade da ETSE, a Escola organizou un curso de formación dos responsables de seguridade dos laboratorios de investigación, continuando co inventario xeral de substancias e equipos, a elaboración de fichas de seguridade en cada laboratorio e unha acción formativa en emerxencias de todo o centro dirixida ao conxunto de colectivos universitarios. Ademais da actualización da avaliación de riscos, aprobouse un Plan de Autoprotección e o documento correspondente ao Sistema de Xestión de Seguridade da ETSE e constituíronse equipos de emerxencias, ademais de realizarse un simulacro de evacuación, entre outras iniciativas. USC, pioneira universitaria A compostelá foi a primeira universidade española que conseguiu esta certificación, cando en 2008 a recibiu para un total de oito centros universitarios. Concretamente, as certificacións foron para o Instituto de Cerámica de Galicia, a Escola Infantil Breogán e as residencias e colexios maiores que forman o Servizo Universitario de Residencias (SUR), os Colexios Maiores Rodríguez Cadarso, San Clemente e Fonseca, e as Residencias Burgo das Nacións, Monte da Condesa e Xesús Bal e Gay. O alumnado da materia Laboratorio de Operacións Básicas utilizando vestimenta adecuada ás normas de seguridade Entre as actividades formativas desenvolvidas, incluíronse cursos de primeiros auxilios