Os mestrados propios da USC no Campus Terra celebraron os seus actos de clausura
O mestrado en Produción do Leite e o mestrado en Enxeñaría da Madeira Estrutural, ambos os dous títulos propios da USC no Campus Terra, celebraron o venres 14 de decembro os seus respectivos actos de clausura.
O máster propio da USC en Produción de Leite pechou a súa cuarta edición coa celebración dun acto na Casa do Saber conducido polo adxunto á Vicerreitoría de Coordinación do campus de Lugo, Jesús Varela Zapata. No marco do mesmo tamén participaron o director da Escola Politécnica Superior de Enxeñaría, Tomás Cuesta; o coordinador do mestrado, José Manuel Pereira González, e o deputado provincial delegado da área de Medio Rural e do Mar, Lino Rodríguez Ónega.
Unha vez rematada a quenda de intervencións, os dez estudantes que completaron a cuarta edición deste posgrao recibiron cadanseu diploma, nunha sesión na que tamén se premiou o bo aproveitamento académico do mesmo acreditado por David Vázquez Novás, Cristina Vázquez Fernández e Carlota Lázare Nadela.
Estes galardóns, que contemplan gratificacións económicas en metálico de 800, 600 e 400 euros, respectivamente, están financiados pola Deputación Provincial de Lugo, Progando, Delagro e a Cooperativa Agraria Provincial da Coruña. Os premios distinguen tanto a excelencia académica do alumnado como a calidade dos traballos fin de máster desenvolvidos, segundo indicou o profesor Pereira González.
Pola súa parte, o mestrado en Enxeñaría da Madeira Estrutural celebrou a súa clausura no salón de actos da Escola Politécnica Superior de Enxeñaría. Na sesión participaron, ademais dos 24 alumnos que completaron este posgrao, así como o director da Plataforma da Enxeñaría da Madeira Estrutural (Pemade), Manuel Guaita; o vicepresidente da Deputación Provincial de Lugo, Argelio Fernández, o xerente da Fundación Laboral da Construción, Fernando García; o director da Axencia Galega de Industrias Forestais, Ignacio Lema, e o director do Departamento de Enxeñaría Agroforestal da USC, Pablo Vila Lameiro.
O director de Pemade, Manuel Guaita, aproveitou este acto para agradecer o esforzo realizado polo alumnado que superou este “esixente programa”, estruturado en 800 horas formativas ao longo de 18 meses con sesións lectivas presenciais e formación telemática, uns agradecementos que tamén fixo extensivos aos 52 docentes (14 son da USC e 38 externos) que imparten formación neste título propio da USC no seu Campus Terra.