O Campus Terra da USC mantén aberta a preinscrición para o máster en Produción de Leite ata o 12 de xullo

O Máster en Produción de Leite, título propio do Campus Terra da USC e cuxa docencia se imparte na Escola Politécnica Superior de Enxeñaría e no Laboratorio Interprofesional Galego de Análise do Leite (LIGAL), mantén aberto o seu prazo de preinscrición ata o vindeiro 12 de xullo no seu enderezo web.  

 

Este máster conforma unha resposta formativa á demanda de especialización das explotacións gandeiras e como principal novidade, no ano académico 2018-2019, oferta dous cursos básicos, dotados con dúas prazas cada un, centrados na alimentación na produción do leite e na economía da explotación do leite, respectivamente. Estes dous módulos formativos poden cursarse de xeito independente, sen necesidade de cursar o resto de módulos do máster, como cursos de formación continua.

Este título propio do Campus Terra da USC alberga un  enfoque  fundamentalmente  práctico  e  aplicado  que aborda os aspectos  fundamentais dende o punto de vista da produción. Os contidos están agrupados en seis  módulos nos  cales  se tratan aspectos de  sanidade  animal,  reprodución  e xenética,  calidade do  leite,  benestar  animal  e  instalacións,  produción  de  forraxes,  alimentación,  economía  e  xestión.

Os titulados co Máster en Produción de Leite poderán cubrir a demanda de expertos en  servizos técnicos especializados e de asesoría que demandan as explotacións gandeiras, as cooperativas agrarias, a industria, as institucións e empresas de servizos.