A compañía de teatro USC-Lugo participa no III Festival Nacional de Teatro Universitario en Toledo

A compañía de teatro USC-Lugo presenta este luns 30 de abril, a partir das 13.00 horas, no Círculo de Arte de Toledo, a súa última montaxe, ‘WK’, un estudo teatral sobre a obra Woyzeck de Georg Büchner baixo a estética do teatro da morte do director de escena polaco Tadeusz Kantor.

A formación teatral do Campus Terra da USC, dirixida por Paloma Lugilde, estreou esta obra no Festival de Teatro Universitario de Lugo, para logo repetir esta actuación en Ourense, na Mostra Internacional de Teatro Universitario (Miteu); en Vigo, e máis recentemente en Santiago de Compostela. A xira da última montaxe da compañía de teatro USC-Lugo chegará ao seu fin o 6 de maio en León.