A Estación Científica do Courel acolle un obradoiro sobre o uso tradicional das plantas medicinais en Galicia

A licenciada en Farmacia pola Universidade de Santiago de Compostela, María Moure Oteiza, imparte entre o 21 e o 23 de abril o ‘II Obradoiro sobre o uso tradicional das plantas medicinais en Galicia: o exemplo do Courel’ que terá lugar na Estación Científica do Courel.

Trátase dun obradoiro intensivo con once horas de teoría e dúas excursións, que constituirán as clases prácticas. En relación á teoría, son catro horas de clase por día con media hora de descanso polo medio. A primeira hora de clase sería de introdución e as 9 seguintes basearíanse en fichas técnicas de 3 plantas medicinais por hora. A última hora de clase, correspondente á clausura, destinarase a un coloquio final para atender as dúbidas, comentarios e preguntas dos asistentes.

Cada ficha técnica está baseada nunha planta medicinal común utilizada en Galicia a nivel tradicional, tomando como referencia as utilizadas na Serra do Courel. Trátase dun total de 30 plantas clasificadas por orde alfabética. De cada unha delas estudarase o seu uso, tanto o recolleito pola Farmacopea oficial como o tradicional. Tamén se estudarán as partes utilizadas e a preparación, así como as precaucións de uso e, no caso de que procedese, o seu significado máxico-medicinal, así como refráns, lendas e cancións. O devandito estudo completaríase cos coñecementos achegados polos asistentes.

A inscrición é gratuíta ata o día 18 de abril chamando aos teléfonos 982821901 (polas tardes), 648051928, 600942418, ou enviando un correo electrónico a ro_rodriguezlopez [at] hotmail.com (ro_rodriguezlopez[at]hotmail[dot]com) ou a antonio.rigueiro [at] usc.es (antonio[dot]rigueiro[at]usc[dot]es) indicando nome e apelidos, DNI con letra, dirección postal e número de teléfono.