A EPS do Campus Terra da USC participa na Coruña nun foro sobre bases cartográficas e topográficas

A Escola Politécnica Superior do Campus Terra da USC participa e colabora na organización dunha xornada sobre bases topográficas e cartográficas centrada na produción e na difusión de información xeográfica a nivel nacional, autonómico e local, que se están a celebrar este luns na sede da Fundación Barrié, na Coruña.

Os obxectivos deste foro sobre bases de datos xeográficas, en cuxa organización tamén colabora a delegación territorial de Galicia do Colexio Oficial de Enxeñaría Xeomática e Topográfica, pasan por facer chegar aos profesionais, empresas e institucións, os avances tecnolóxicos e metodolóxicos que se están a producir neste eido.

Achegar ao público en xeral as ferramentas existentes na actualidade e a través das que poden acceder de xeito sinxelo e sen limitacións á información xeográfica, é outro dos cometidos que pretenden os promotores desta xornada monográfica.