Variación e cambio lingüístico, a debate en Filoloxía
A segunda edición da Xornada sobre Variación e Cambio Lingüístico, organizada polo Instituto da Lingua Galega (ILG) da USC e o Centro de Línguas, Literaturas e Culturas da Universidade de Aveiro, mantén aberto o prazo para o envío de propostas de comunicacións orais, que concorden coa temática do encontro, ata o 15 de xuño. A xornada desenvolverase o 9 de outubro na Facultade de Filoloxía da USC e abordará o estudo da variación e do cambio lingüístico en espazos urbanos.
O encontro contará coa participación de Isabel Molina Martos, da Universidade de Alcalá de Henares, e de Leonardo Marcotulio, da Universidade de Aveiro. Molina falará sobre procesos de variación e cambio en Madrid e afondará no papel das identidades na formación de ‘rexiolectos’. Pola súa parte, o profesor Marcotulio ofrecerá a conferencia ‘Há variedades sem identidade linguística? Novos dados sobre o português falado em Aveiro’.
As conferencias e comunicacións presentadas na xornada serán publicadas na revista Estudos de Lingüística Galega, tras superar o proceso de revisión establecido pola publicación. Na páxina web da xornada pódese ampliar a información sobre o encontro.
