Español

O Centro de Linguas Modernas da USC ofrécelles aos estudantes estranxeiros da USC de programas de mobilidade e a todas as persoas interesadas maiores de 18 anos os Cursos de español como lingua estranxeira (ELE), adaptados aos niveis A1, A2, B1, B2, C1 e C2 do Marco Europeo Común de Referencia para as Linguas (MECRL).

Teñen unha duración de 100 horas (40 horas lectivas presenciais e 60 de traballo autónomo tutelado). Os cursos poden ter un formato semestral (setembro-decembro, febreiro-maio) ou intensivo de 2 meses (setembro-outubro, novembro-decembro, febreiro-marzo, abril-maio).

Os grupos teñen un máximo de 15 alumnos.

A avaliación dos cursos é continua. A cualificación final comprende a asistencia e participación nas sesións de clase (30%), a realización e entrega de tarefas (30%) e a superación das probas finais oral e escrita (40%).

Para obter o certificado do curso e créditos ECTS cómpre superar a avaliación e asistir a un mínimo do 80% das horas de clase.

Tamén se ofrece un curso de preparación do exame para a obtención do Diploma de Español como Lingua Estranxeira, do nivel C1. Este curso é de 20 horas.

O alumnado dos países que non teñen como lingua oficial o castelán ou portugués debe acreditar o coñecemento da lingua española ou galega mediante un título de nivel B1 ou B2, segundo o caso, do Marco Común Europeo de Referencia para as Linguas, para poderen cursar na USC estudos de grao ou de mestrado.

As persoas aspirantes a unha praza de profesorado permanente da USC que non sexan nacionais de Estados que teñen o español como lingua oficial teñen o requisito de acreditar o coñecemento das dúas linguas oficiais. O do español acreditarase mediante un diploma de español como lingua estranxeira de nivel B2 ou superior. No caso de non posuír este título, terá un prazo de dous anos para conseguilo dende a súa contratación ou nomeamento.

Para acreditar os teus coñecementos de español na USC, a universidade ofréceche varias vías:

• Achegar un título ou diploma que estea recoñecido pola USC.
• Aprobar un curso de español no CLM da USC que complete un nivel do MCERL.
• Presentarte ás probas de competencia lingüística de español do CLM antes de comezar os estudos. De non superar esta proba de competencia lingüística, tes a obriga de seguir un curso do CLM e volver presentarse á seguinte data de exame.

Nos estudos de grao da USC poden recoñecerse créditos por competencias transversais, por exemplo, por actividades de formación en linguas.

A realización dos cursos de español como idioma estranxeiro no CLM por parte de persoas procedentes de países de fala non española, dá dereito ao recoñecemento de créditos ECTS nos estudos de grao, desde os 3 ECTS do B1 ata os 6 ECTS do C2.

A realización dos cursos de ELE pode ser recoñecida con 4 créditos ECTS na universidade de orixe.