USC, UVigo e CSIC optimizan ferramentas xenómicas a prol da xestión sostible e da mellora da produtividade acuícola
O catedrático da área de Xenética da USC Paulino Martínez Portela e a investigadora do Instituto de Investigacións Mariñas do CSIC Laura Casas coordinan o grupo de traballo do proxecto Ciencias Mariñas de Galicia responsable da optimización do emprego das ferramentas xenómicas dispoñibles para mellorar a resistencia e a produtividade acuícola de especies estratéxicas para as pesqueiras galegas, tales como a pescada, o rodaballo, mexillóns, ameixas, berberechos...
O persoal investigador responsables do desenvolvemento do paquete de accións do proxecto #CienciasMariñasGal, un equipo formado por preto de 30 persoas, entre as que figuran membros do grupo de Xenética da UVigo que dirixe Armando Caballero, mantivo este mércores unha xuntanza de traballo na Facultade de Veterinaria do Campus Terra da USC, no marco da que, de xeito colaborativo, intercambiaron información e resultados de laboratorio orientados a mellorar a xenética das especies acuáticas, a través da identificación dos xenes implicados nos procesos de acumulación de toxinas ou das, entre outras, patoloxías provocadas por parasitos, ademais de para facelas máis resilentes ao cambio climático.
O grupo de traballo do proxecto Ciencias Mariñas de Galicia, unha iniciativa financiada con fondos Next Generation, coordinado por Martínez e Casas e no que participa persoal dos principais centros de investigacións mariñas, busca aplicar os avances recentes en xenómica para abordar desafíos chave na xestión sostible de recursos de acuicultura e pesca. Cun enfoque colaborativo, integrador e multidisciplinar, este grupo investigador promove a cooperación entre institucións e expertos, desenvolvendo ferramentas avanzadas como a secuenciación de xenomas e a identificación de marcadores para mellorar a xestión pesqueira e a produción acuícola.
A transformación da xestión pesqueira e acuícola mediante a aplicación de coñecementos xenómicos avanzados e un dos cometidos deste programa, que procura tamén unha xestión máis sostible e eficiente dos recursos mariños en acuicultura e pescada e busca reducir as incidencia de enfermidades detectadas en moluscos, ademais de avanzar na exploración de tecnoloxías innovadoras como chips multiespecie de SNPs e aplicacións bioinformáticas para mellorar a selección na produción acuícola.
