Os orzamentos da USC para 2010 sométense á aprobación do Consello Social

Os orzamentos da USC para 2010 deberán superar o vindeiro luns 22 á derradeira etapa para a súa aprobación definitiva, logo de recibir o apoio do Consello de Goberno, ao presentarse agora ante o Consello Social da institución docente, que celebrará unha xuntanza do seu Pleno.
Nesta reunión, a celebrar a partir das 17:00 horas na Casa da Concha, tamén se someterá a aprobación o orzamento do propio Consello Social e a súa memoria correspondente a 2009. Ademais tratarase a aprobación da proposta de asignación de Complementos Retributivos, o informe sobre a modificación da Relación de Postos de Traballo do Persoal de Administración e Servizos ou un informe da Vicerreitoría de Política Internacional sobre actividades de internacionalización.
Completando a orde do día desta xuntanza o Consello deberá debater sobre a proposta de creación e regulamento dos centros singulares de investigación en Química Biolóxica e Materiais Moleculares, e Medicina Molecular e Enfermidades Crónicas; ademais de tratar a aprobación de taxas de cursos de posgrao propios e información de memorias; de modificacións de titulacións; doazóns; e información sobre convenios da Universidade.