A Escola de Relacións Laborais de Lugo organizou unha xornada sobre as saídas profesionais da titulación

A Escola Universitaria de Relacións Laborais de Lugo organizou este mércores 23 unhas charlas dirixidas aos alumnos da titulación, nas que se lles achegou información sobre as súas posibles saídas laborais. A charla inicial correu a cargo do letrado do INSS e vicexerente da USC no Campus de Lugo entre os anos 1992 e 2000, José Vázquez Portomeñe, quen falou sobre as claves dunha boa negociación no marco laboral. A continuación interveu a directora da Academia Postal en Lugo, cun relatorio sobre as estratexias de preparación de temarios para o acceso á Administración pública. O primeiro bloque do programa pechouse coa presenza dunha representante do Colexio de Graduados Sociais de Lugo, quen informou aos asistentes sobre a actividade do Colexio e as especificidades do exercicio da profesión de graduado social. A segunda parte da sesión comezou cunha mesa redonda na que, baixo o título ‘O exercicio profesional na empresa’, interviron responsables de prevención, recursos humanos e administración de varias empresas lucenses como Ingapán ou Monbús. O encontro concluíu co relatorio ‘Cursos de posgrao’, a cargo de Guillermo Álvarez de Neyra, director do máster Paulo Fabio en Dirección de Recursos Humanos que se imparte na Escola de Relacións Laborais de Lugo.