A exposición dedicada a Carolina Michaëlis de Vasconcelos pecha este xoves en Filoloxía

A exposición bibliográfica e documental ‘Vida e Obra de Carolina Michaëlis de Vasconcelos’ pechará as súas portas este xoves 14 nun acto no que tamén está prevista a conferencia que pronunciará a profesora da Universidade de Campinas Yara Frateschi titulada ‘Carolina Michaëlis de Vasconcelos e os cancioneiros medievais galego-portugeses’. Esta sesión, que se vai celebrar a partir das 12:00 horas no Salón de Graos da Facultade de Filoloxía, pon punto e final a unha mostra que pretendía render homenaxe á considerada como gran mestra da filoloxía galega e portuguesa, romanista e á que fora a primeira doutora en Letras e primeira profesora da Universidade de Coimbra. A conferenciante da xornada, a profesora de literatura portuguesa e investigadora da Universidade de Campinas (São Paulo) Yara Frateschi Vieira, levou a cabo a edición crítica dos estudos filolóxicos realizados por insignes figuras da Filoloxía Románica e relacionadas especialmente coa cultura galego-portuguesa polos seus temas de estudo, tales como a propia Carolina Michaelis de Vasconcenlos, Óscar Nobiling ou Henri Lang.