O recoñecido astrofísico Xavier Barcons Jáuregui explicará nunha conferencia a orixe e desenvolvemento do universo

O astrofísico Xavier Barcons Jaúregui, profesor de Investigación do CSIC no Instituto de Física de Cantabria, pronunciará este xoves, 1 de marzo, na Facultade de Matemáticas a conferencia ‘A orixe e desenvolvemento do universo’. A intervención, organizada polo Observatorio Astronómico Ramón María Aller da USC, terá lugar ás 19:00 horas na Aula Magna do centro.
Xavier Barcons, que o venres participará no tribunal da tese de doutoramento de Manuel Andrade que dirixe o director do Observatorio, José Ángel Docobo, é na actualidade asesor de Infraestruturas Astronómicas do Ministerio de Educación e Ciencia e xefe da delegación española en ESO.
Foi ademais xestor do Programa Nacional de Astronomía e Astrofísica, asesor do Programa Científico da ESA de 2001 a 2005, membro do Astronomy Working Group e do Space Science Advisory Committee e director do Instituto de Física de Cantabria de 1995 a 1999.
A súa actividade investigadora xira en torno á astronomía e as Ciencias do Espazo así como á astronomía con raios X, galaxias e cosmoloxía. Na actualidade é coinvestigador do XMM-Newton Survey Science Centre e membro do comité científico asesor da misión XEUS.
Con máis de 80 artigos publicados en revistas especializadas da área de Física e Astrofísica que recibiron arredor de 1.500 citas no Science Citation Index, ten recollidas en libros e revistas unhas corenta contribucións a congresos especializados.