Artículo

Maite Cancelo, nova decana da Facultade de Ciencias Económicas e Empresariais

A profesora de Econometría Maite Cancelo Márquez resultou elixida nova decana da Facultade de Ciencias Económicas e Empresariais logo da votación celebrada este luns no Salón de Graos do centro con 55 votos a favor. O resto do equipo decanal estará composto pola profesora Pilar Díaz Vázquez como vicedecana de Asuntos Académicos, polo docente Alejandro Ballesteros Ron como vicedecano de Relacións Exteriores e Intercambios, e a profesora Mercedes Tato Rodríguez como secretaria. No proceso electoral tamén participou a profesora María Luisa del Río que acadou 51 votos.

Martes, 13 de febrero de 2007

Despois da elección, a nova decana, profesora do Departamento de Economía Cuantitativa, pasa a ser a primeira muller que ocupe este posto na Facultade de Económicas substituíndo ao profesor Manuel Jaime Barreiro Gil, con quen foi vicedecana de Organización Académica.
A liña de traballo da responsable da Facultade céntrase na posta en marcha dos novos títulos de grao e posgrao enmarcados no Espazo Europeo de Educación Superior. Para conseguir este obxectivo, o novo equipo pretende constituír comités específicos, participar nos grupos de traballo da Conferencia de Decanos, formar ao profesorado, mellorar a calidade da formación e preparar as acreditacións dos títulos que están a impartir na actualidade.
O seu labor docente comprende distintas materias de econometría, teórica e aplicada, nas licenciaturas de Economía e de Administración e Dirección de Empresas, así coma en programas de doutoramento e posgrao, onde tamén impartiu cursos sobre economía europea e concorrencia industrial.