Blanco e Cidrás estimulan a creatividade da infancia con material non estruturado para usos pedagóxicos
Os artistas plásticos promotores do grupo de innovación educativa Escola Imaxinada e docentes na Facultade de Formación do Profesorado do Campus de Lugo da USC, Vicente Blanco Mosquera e Salvador Cidrás, estimulan a creatividade da infancia co desenvolvemento de escenarios e materiais non estruturados que favorecen o enxeño dos máis cativos e foxen de estereotipos aínda presentes na escola.
O proxecto ‘Trebello’, incluído na exposición sobre roles das institucións educativas ‘Derrotas: formas de pensar’, que permanece aberta ao público no espazo de intervención cultural Normal da UDC, na Coruña, sintetiza en gran medida o labor de investigación e innovación artística en contextos educativos que ocupa e preocupa desde hai anos a Blanco e Cidrás.
O material non estruturado que conforma ‘Trebello’, un proxecto innovador presentado por vez primeira en Bogotá, no marco da I Bienal Internacional da Infancia promovida polo Goberno de Colombia, afonda na “pedagoxía da creatividade” a través de formas e contextos de acción que ofrecen oportunidades para crear.
A palabra trebello, do mesmo xeito que o proxecto educativo ao que dá nome, pon en valor a inventiva, a espontaneidade e resolución de problemas con poucos recursos, sinala Blanco Mosquera, para logo engadir que esta intervención reivindica a creatividade artesanal dos utensilios que se empregaban nunha sociedade eminentemente rural e que pouco ou nada teñen que ver cos elementos estandarizados (fichas e outros materiais) que na actualidade rexen a actividade escolar nas aulas.
Alén do proxecto Trebello, a través dos que os máis cativos traballan e gozan das novas formas que se lles achega para logo plasmar a súa capacidade creativa en debuxos, así como das súas respectivas creacións artísticas persoais, Vicente Blanco Mosquera e Salvador Cidrás, avanzan na súa teima a prol da innovación educativa da man do proxecto ‘A aula do caos’, tal e como chaman a intervención que están a desenvolver nun centro educativo de Valencia a través dunha residencia de artistas concedida polo Goberno da Comunidade Valenciana.