Ciencias da Educación entrega os Sarmientos de Honra no día da súa festividade
A Facultade de Ciencias da Educación conmemorou este venres 10 o día da súa festividade a través dun acto institucional presidido pola vicerreitora de Estudantes e Cultura, Pilar Murias, e que serviu para facer entrega dos Sarmientos de Honra ás profesoras Ana María Porto Castro, María Teresa Fernández Blanco e Adriana Gewerc Barujel, en recoñecemento á súa traxectoria.
A sesión contou coas intervencións da decana Mar Lorenzo, da vicedecana María López Sández e do secretario da Facultade Jesús García Álvarez. O relatorio central do acto, titulado ‘Coñecemento compartido e coñecemento negado’, correu a cargo da profesora xubilada, María Pilar Jiménez Aleixandre, coñecida na súa traxectoria literaria como Marilar Aleixandre.
A entrega simbólica de diplomas dos premios extraordinarios de grao e mestrado do curso académico 2021-2022 distinguiu a Rebeca Puentes Carro, Paula Barbosa da Silva, Mireia Hidalgo Milla, Marcos Pequeño Goris, Inés Ramos Trasar, Javier Riadigos Couso, Aída Fernández Villar, Javier Frieiro Santaya e Julia Feijóo Outomuro.
O acto tamén contou coa actuación musical a cargo de Mario Diz Otero, director da orquestra da USC e profesor do Departamento de Didácticas Aplicadas da Facultade de Ciencias da Educación.
