A profesora Carmen Sarceda renova o seu mandato como decana da Facultade de Formación do Profesorado

A profesora da área de Didáctica e Organización Escolar da USC Carmen Sarceda Gorgoso renova o seu mandato como decana da Facultade de Formación do Profesorado da USC, logo de que a candidatura que encabezaba, a única que concorría ás eleccións celebradas este xoves no centro universitario lugués, acadara o respaldo do 89% dos 24 sufraxios rexistrados.

Sarceda Gorgoso, que en 2019 se converteu na primeira muller en accedeu ao decanato da Facultade de Formación do Profesorado da USC, afronta esta segunda etapa á fronte do centro universitario lugués con máis alumnado, cun “equipo ampliado e de forte carácter interdisciplinar que tratará de atender as distintas sensibilidades do centro con maior tradición académica do Campus de Lugo”. Daquela, o  profesor da área de psicoloxía evolutiva e da educación Santiago López Gómez e a docente da área de filoloxía inglesa Paula López Rúa ocuparán cadanseu vicedecanato da Facultade de Foramción do Profesorado, mentres que Virginia Aznar Cuadrado, da área de didáctica das ciencias experimentarias continuará a exercer as funcións de secretaria.

O programa de goberno do equipo decanal electo vertébrase arredor de cinco grandes eixes, tal e como son a xestión, a docencia e a investigación, os recursos humanos, as infraestruturas, e o alumnado, segundo indica Carmen Sarceda, quen reiterou a súa aposta por “unha xestión transparente, áxil, próxima e efectiva”, acorde ás esixencias que se lle demandan a unha Facultade no contexto universitario e social actual.

Respecto da docencia e a investigación, dous cometidos que forman parte da responsabilidade da Universidade de transmitir e xerar coñecemento, Sarceda Gorgoso entende que “tales tarefas deben densevolverse da man, a fin de que facilitar a súa retroalimentación en aras de avanzar cara a cotas de maior calidade”. Para a consecución destes obxectivos, os recursos humanos teñen unha importancia capital, engade a decana, quen, convencida de que “o bo funcionamento do centro no pode basearse na voluntaridade dos traballadores”, comprométese a traballar para paliar as actuais limitacións de recursos humanos do centro.

Unha realidade semellante é a que se atisba no plano das infraestruturas. Carmen Sarceda destaca o grande esforzo realizado nos últimos catro anos para mellorar as infraestruturas e as dotacións existentes a distintos niveis. Aínda así, a decana da Facultade de Formación do Profesorado recoñece que “existe un amplo espazo para a mellora”. Daquela, Sarceda adianta que o novo equipo de dirección traballará de xeito proactivo para que o traslado da actual sede da facultade ao corazón do Campus dea resposta satisfactoria ás necesidades expresadas pola comunidade educativa.

Alumnado

O alumnado consistúe a dimensión básica e máis importante para o equipo decanal da Facultade de Formación do Profesorado, asegura Carmen Sarceda, para quen o estudantado universitario debe estar preparado para dar resposta aos desafíos dunha sociedade cada vez máis globalizada e caracterizada por cambios constantes. Esta nova realidade debe implicar tamén cambios na formación dos futuros profesionais do ensino e da educación, aos que cómpre ofrecer unha sólida base de coñecementos que redunde no desenvolvemento de competencias profesionais óptimas.

A profesión docente, subliña Sarceda Gorgoso, vai máis alá da práctica profesional, posto que supón desenvolver competencias de compromiso social, compromiso coa igualdade en todas as súas dimensións, compromiso coa cultura galega, coa diversidade cultural, social, individual, etc. “Entendemos a función docente como un labor de transformación da realidade a través da súa práctica”, conclúe a decana da Facultade de Formación do Profesorado da USC.