Premios e recoñecementos na Facultade de Humanidades para celebrar a festividade de San Isidoro

A Facultade de Humanidades do Campus Terra da USC celebrou este martes a desta de San Isidoro, patrón das Humanidades, cun acto institucional no marco do que se procedeu ao recoñecemento público das contribucións feitas ao centro universitario lugués polos ex vicerreitores Pedro García Herradón e Carlos Herrero Latorre. A entregra de diplomas acreditativos aos titulados/as no centro durante curso 2014-2015 e a incorporación formal de Felipe Arias como no profesor ‘ad honorem’ da Facultade de Humanidades completaron o programa dunha emotiva sesión.

O vicerreitor de Coordinación do campus de Lugo, Javier Bueno Lema; a decana da Facultade de Humanidades, María Isabel González Rey, e a alcaldesa do Concello de Lugo, Lara Méndez, presidiron unha concorrida cerimonia institucional conmemorativa da festividade de San Isidoro e que encheu de público o salón de graos do centro universitario. Un breve balance da evolución experimentada pola Facultade de Humanidades, a cargo da decana María Isabel González Rey e a entrega das insignias do centro a Carlos Herrero e Pedro García Herradón, serviron de preludio á benvida formal de Felipe Arias como novo profesor ad honorem da Facultade de Humanidades. O tamén profesor ‘ad honorem’ deste centro universitario lugués Max Jeans Zins lembrou a traxectoria profesional de Felipe Arias, quen logo pronunciou o relatorio ‘O patrimonio cultural como recurso’.

A entrega dos premios extraordinarios a Cristina Fiaño Rodríguez e Ana González Herraiz como mellores estudantes do grao en Ciencias da Cultura e Difusión Cultural tituladas no curso 2014-15, e a Miriam Tallón Somoza, como mellor expediente académico da última promoción do Máster Universtiario en Servizos Culturais, serviron de pecho do acto académico da festividade de San Isidoro.