Ampliado ata o 12 de abril o prazo para matricularse no exame CILS de italiano na USC

O Centro de Linguas Modernas da USC (CLM) acaba de ampliar ata o próximo 12 de abril o prazo de matrícula para as persoas interesadas en realizar os exames CILS (Certificazione di Italiano come lingua straniera) da Università per Stranieri di Siena para a Lingua Italiana como lingua estranxeira. Concretamente, as probas a realizar correspóndense cos exames CILS UNO-B1 e DUE-B2 (no mes de xuño) en Santiago. O Centro de Linguas Modernas compostelá é dende 2007 centro examinador en Galicia para estas probas da Università per Stranieri di Siena. Na páxina web da Università per Stranieri di Siena pode consultarse o manual ‘Le Linee guida CILS’ que contén tanto a descrición pormenorizada dos contidos de cada un dos niveis como a descrición das probas. Na mesma páxina pódense atopar tamén exames de convocatorias pasadas coas súas correspondentes claves e criterios de corrección.