Alta participación nas xornadas de divulgación científica no CIQUS

O Centro Singular de Investigación en Química Biolóxica e Materiais Moleculares (CIQUS) da Universidade de Santiago de Compostela celebrou con grande éxito, baixo o título 'A Investigación en Química: ciencia creativa para un mundo mellor', unhas xornadas de divulgación científica nas que participaron alumnos de 2º de bacharelato de 14 centros de ensino de Galicia. Con elas pretendíase visualizar a importancia da Química e a súa implicación no desenvolvemento e benestar da sociedade á vez que achegar ao alumnado á realidade dun centro de investigación. As actividades remataron o venres, xa pola noite, cunha xornada de portas abertas para persoas adultas e nenos na que se achegaron ao centro máis de 300 persoas, que puideron coñecer algunhas das instalacións e liñas de investigación do CIQUS e que, segundo puxo de manifesto a directora, a profesora Dolores Pérez, "puideron achegarse á ciencia e á química, en particular, de maneira divertida e participativa". O vicerreitor de Investigación e Innovación, Francisco González García, que participou xunto coa directora do centro e varios docentes e investigadores no desenvolvemento desta actividade, valorou moi positivamente a participación da cidadanía e dos estudantes e recordou que "a Química é capaz de crear novas moléculas e materiais ou de inventar novas reaccións para transformar a materia".