Éxito de participantes nos cursos de verán da USC sobre plantas medicinais nas reservas da biosfera e ‘O corpo a debate’

Os cursos de verán ‘As plantas medicinais no desenvolvemento sostible das reservas da biosfera Terras do Miño e Ancares Lucenses’ e ‘O corpo a debate’ reúnen desde este luns ata o vindeiro xoves, día 1 de agosto na Escola Politécnica Superior do campus de Lugo e na Facultade de Filosofía de Santiago, respectivamente, preto de 200 persoas.

O vicerreitor adxunto de Innovación e Investigación do campus de Lugo, Pablo Ramil; os directores deste seminario da Universidade de Verán 2013, Rosa Romero e Antonio Rigueiro, e o director da Escola Politécnica Superior, Javier Bueno; a directora do Ibader, Elvira López Mosquera; a concelleira de Educación do Concello de Lugo, Esther Muñoz, e a deputada provincial delegada da área de Medio Ambiente, Sonsoles López Izquierdo, inauguraron esta mañá este curso de verán, o programa que rexistrou un maior número de persoas matriculadas de todos os programados ao abeiro da Universidade de Verán 2013. Un relatorio sobre a historia da utilización das plantas medicinais, a cargo do profesor do Departamento de Botánica da Universidade de Santiago Pablo Ramil Rego, abriu a quenda de intervencións neste foro, no que relatores de Galicia e tamén procedentes doutras comunidades autónomas abordan a riqueza natural e o potencial económica das plantas medicinais. Os principios activos e a actividade terapéutica dos principais grupos de plantas medicinais, as especies vexetais con interese medicinal en Galicia, e a influencia dos factores ambientais nas propiedades destas plantas serán outros dos temas a tratar na primeira xornada deste curso de verán, cuxa elevada presenza de asistentes obrigou a trasladar a súa sede do Ibader á Escola Politécnica. A temática dos relatorios programados na segunda xornada deste curso abrangue cuestións moi diversas, tales como a importancia económica do aproveitamento de plantas medicinais, o seu procesado industrial ou o cultivo ecolóxico. Os modelos de produción e cultivo destes vexetais en Cataluña centrará o último dos relatorios que se celebrarán o 30 de xullo. A penúltima xornada do curso ‘As plantas medicinais no desenvolvemento sostible das reservas da biosfera Terras do Miño e Ancares Lucenses’, inclúe unha viaxe de prácticas á Insua de Seivane, dentro da Reserva da Biosfera Terras do Miño e do LIC Ladra-Parga-Támoga, durante a que as persoas inscritas neste curso de verán da USC poderán poñer en práctica e recoñecer as distintas plantas medicinais que atopen no campo. Xa pola tarde, haberá obradoiros de cosmética natural, que serán impartidos por persoal de Milhulloa Plantas Medicinais e Aromáticas Sociedade Cooperativa Galega. Este curso de verán sobre plantas medicinais nas reservas da biosfera Terras do Miño e Ancares Lucenses rematará o 1 de agosto con dous relatorios sobre fungos medicinais e recolección e cultivo de xanzá. O corpo a debate O curso de verán ‘O corpo a debate: diversidade nos mecanismos, prácticas e avatares da corporalidade como inscrición social’, organizado polo proxecto campUSCulturae e dirixido polo profesor Xosé A. Neira Cruz, converte desde hoxe ata o vindeiro xoves a Facultade de Filosofía de Santiago nun espazo aberto de coñecemento e de debate sobre unha temática que espertou o interese de preto de 80 matriculados. Nesta proposta formativa e divulgativa da Universidade de Verán 2013 intervirán como relatores, entre outros, os profesores da USC Ángel Carracedo e Teresa Moure, a investigadora da Universidade Complutense de Madrid Raquel Lucas Platero ou o teólogo e profesor Andrés Torres Queiruga.

O corpo a debate entronca coa celebración do congreso ‘NOSoutros: Arte, comu-nicación e integración social’, que tivo lugar o pasado mes de decembro na Facultade de Ciencias da Comunicación. Segundo explican os promotores deste curso, a raíz do devandito congreso emerxeu unha batería de cuestións que desbordaban o marco expositivo do mesmo. Así, o feito de reflexionar arredor da diversidade orgánica e funcional destapou a necesidade de reformular, máis en profundidade, a problemática do corpo como inscrición social, engaden os organizadores. O curso de verán ‘O corpo a debate’ será retransmitido en streaming a través da web do proxecto campUSCulturae (http://campusculturae.usc.es).

Autoridades académicas e políticas que participaron na inauguración do seminario