A USC e Boehringer Ingelheim impartirán o vindeiro ano a segunda edición do curso especializado en EPOC dirixido a enfermaría

A USC, co patrocinio de Boehringer Ingelheim España, impartirá a partir do próximo mes de outubro a segunda edición do curso de especialización sobre atención integral á Enfermidade Pulmonar Obstrutiva (EPOC) dirixido a profesionais de enfermaría, e cuxa oferta no presente curso supuxo unha iniciativa pioneira na Universidade pública española. O reitor da USC Antonio López e o director xeral de Boehringer Ingelheim en España, Peter Ploeger, manifestaron a vontade de ambas as dúas partes de manter a colaboración para o desenvolvemento desta segunda edición, destacando a boa acollida que o curso espertou. Ambos mantiveron unha reunión de seguimento este martes no Colexio de San Xerome na que tamén participaron o director de Market Access de Boehringer Ingelheim España, Joan Heras, entre outros directivos da compañía farmacéutica, así como os profesores Alberto Fernández Villar e Alberto Ruano; a vicerreitora de Titulacións, Victoria Otero; e a directora do Centro de Estudos Propio, Ana Díaz.

A falta de coñecementos específicos sobre patoloxías respiratorias é un dos principais problemas aos que se enfronta o persoal de enfermería no seu día a día. Este é o caso da EPOC. Baixo a co dirección do profesor asociado de Medicina da USC e xefe do Servizo de Pneumoloxía do Hospital Álvaro Cunqueiro de Vigo, Alberto Fernández Villar, e do profesor titular de Medicina Preventiva e Saúde Pública da USC Alberto Ruano o curso diríxese a persoas con grao ou diplomatura de Enfermaría, priorizando a experiencia en EPOC. Trátase dunha formación regrada que comezará o próximo 16 de outubro e que se estenderá ata o 30 de xuño de 2020.

O curso permite desenvolver coñecementos e habilidades entre o colectivo da enfermaría que contribúan a unha mellora da calidade de vida do paciente e a unha xestión máis eficiente dos procesos relacionados con esta patoloxía tan prevalecente e complexa. A dimensión que alcanzou a enfermidade na actualidade, a carga asistencial que conleva, os avances na investigación, os novos fármacos en desenvolvemento ou a creación de novas estratexias de atención ao paciente, deu lugar a unha crecente demanda de formación universitaria neste ámbito.

"O obxectivo do curso é poder complementar os coñecementos deste colectivo sobre esta patoloxía crónica, intimamente vinculada ao consumo de tabaco, o que fai que, con frecuencia, se asocie a outras enfermidades ou comorbilidades dificultando o seu correcto manexo”, explica o doutor Fernández Villar. “Desta maneira, disporán dos coñecementos necesarios para resolver os casos e situacións clínicas máis relevantes relacionadas coa EPOC, e poderán deseñar e poñer en marcha proxectos de innovación, investigación e organizativos a nivel local ou mesmo comunitario para implementar a atención e coñecemento da enfermidade", apunta Alberto Fernández.

Programa
O programa está estruturado en torno ao diagnóstico, abordaxe e seguimento da EPOC, cun contido “ambicioso, intensivo e moi completo”, apunta o profesor Ruano. Epidemioloxía, carga asistencial, diagnóstico e cribado da enfermidade (con especial énfase na realización e interpretación da espirometría) son algúns dos bloques máis destacados, ademais da adecuada abordaxe terapéutica (novas clasificacións e familias terapéuticas, novos fármacos, educación e uso adecuado da inhaloterapia) ou o seguimento do paciente.

Así mesmo, cada módulo ten un apartado práctico con casos reais. “Os casos clínicos corresponderán a situacións frecuentes que se presentan en clínica polo que terán un papel moi relevante, xa que os consideramos imprescindibles para dar a coñecer casos reais aos alumnos e mostrarlles as ferramentas para resolvelos satisfactoriamente”, engade Ruano. Proba diso é a plataforma online nas que os alumnos terán que subir vídeos autogravados poñendo en práctica unha espirometría con criterios de calidade ou usando os dispositivos inhalatorios correctamente.

Cuarta causa de mortalidade no mundo
A EPOC é unha das principais causas de morte e discapacidade en todo o mundo e ten un impacto físico e emocional significativo nas persoas que a padecen. Cando a enfermidade progresa aparece a dispnea que conleva unha diminución da función pulmonar e convértese nunha causa importante de discapacidade e ansiedade. Ademais, vai acompañada de síntomas que desencadean temor, frustración, illamento e depresión nos pacientes.

Segundo a OMS actualmente máis de 210 millóns de persoas conviven coa EPOC e estímase que se poida converter na terceira causa de morte mundial en 2030. Os pacientes a miúdo presentan outras comorbilidades graves como cardiopatías, diabetes, osteoporoses e depresión, o que dificulta o seu tratamento. Debido ao carácter crónico da enfermidade e aos seus síntomas incapacitantes, supón unha carga significativa para os coidadores ou familiares.O diagnóstico precoz e unha intervención terapéutica adecuada despois dunha exacerbación son esenciais para a recuperación rápida dos pacientes e a melloría da súa calidade de vida.

O papel do persoal de enfermaría
Os profesionais de enfermería xogan un rol crucial neste aspecto dada a importancia epidemiolóxica da enfermidade, xa que ten un contacto moi directo co paciente, en ocasións, máis frecuente do que pode ter o médico. Por esta razón, débese recoñecer a súa capacidade para realizar unha xestión activa e mellorar a calidade asistencial dos casos de EPOC, ademais da súa influencia para empoderar aos pacientes na xestión da enfermidade.

Ser proactivo na creación de novas iniciativas e retos na mellora da atención á EPOC é esencial. Por iso, a última parte do curso céntrase en que os alumnos propoñan un pequeno proxecto asistencial dentro da súa contorna de traballo. Desta maneira, o persoal de enfermaría poderá apoiar ao especialista no seguimento, dar unha atención de calidade ao paciente e contribuír á mellora da cronicidade do sistema. E aínda máis importante, “que estes expertos convértanse en transmisores deste coñecemento nos seus centros, xa que a nosa idea principal é que o profesional que finalice este curso estea capacitado para formar nun nivel local aos seus compañeiros. Este tipo de iniciativas non só benefician ao colectivo de enfermaría, senón aos servizos de Pneumoloxía e ao sistema sanitario en xeral reunindo aos mellores profesionais en equipos multidisciplinares”, tal e como apunta o doutor Fernández.

“Dende Boehringer Ingelheim, conscientes do desafío que constitúe esta patoloxía crónica para o sistema sanitario, avogamos firmemente pola formación continuada dos profesionais sanitarios para seguir mellorando no diagnóstico e tratamento da EPOC”, afirma Peter Ploeger, director xeral de Boehringer Ingelheim en España. “Comprometidos coa saúde respiratoria desde hai máis de 90 anos, en Boehringer Ingelheim innovamos da man de equipos sensibilizados coa formación continuada e especialización de profesionais sanitarios no diagnóstico e manexo da EPOC, entre outras patoloxías respiratorias, todo iso sempre en beneficio da mellora na atención ao paciente e cunha visión multidisciplinar da enfermidade” engadiu o director xeral da compañía.

Boehringer Ingelheim
Durante máis de 130 anos, Boehringer Ingelheim perseguiu o obxectivo de mellorar e preservar a calidade de vida e a saúde dos seres humanos e os animais. Con sede en Ingelheim am Rhein, Alemaña, a empresa é de propiedade familiar dende a súa fundación en 1885 e atópase entre as 20 empresas líderes do mundo na súa industria. Boehringer Ingelheim opera, a nivel global, con máis de 50.000 empregados.

Con sede en Sant Cugat do Vallès (Barcelona), a compañía instalouse en España en 1952. Actualmente ocupa a posición número 10 na clasificación de compañías farmacéuticas. Conta con máis de 1.700 colaboradores, dous centros internacionais de produción farmacéutica e unha unidade dedicada especificamente a I+D+i. En España, o Grupo tamén implementou tres áreas innovadoras que dan servizo a toda a Corporación: o IT Service Center, que optimiza os servizos tecnolóxicos e informáticos; o Service Delivery Center, que dá soporte á promoción de medicamentos, e o Regulatory Affairs Service Center, que apoia nos procesos de rexistro e reevaluación de produtos de uso humano e veterinario. No país, a compañía foi recoñecida como empresa Top Employer os anos 2016, 2017, 2018 e 2019.