O Grupo Compostela de Universidades contará cun estudante en prácticas do Loras College de Iowa
O Grupo Compostela de Universidades incorporará ata o mes de abril ao estudante en prácticas do Loras College de Iowa (Estados Unidos) Joshua Utter, que ademais de asistir a un dos Cursos Internacionais da USC durante a súa estadía terá a ocasión de coñecer o complexo traballo desta rede universitaria internacional.
O acto de recepción tivo lugar este martes nas instalacións do Grupo Compostela na Casa da Cuncha. Alí o vicerreitor de Relacións Exteriores, Víctor Millet, e a xerente de Cursos Internacionais da USC, Lanzada Calatayud, recibiron ao director da oficina Study Abroad do Loras College, Mark E.Kehren, e ao estudante.
International Video Contest
Coa recepción dun estudante na súa Secretaría, o Grupo Compostela continúa unha liña de actividades centradas na comunidade estudantil que xa collera forza co anuncio ás universidades, a finais do ano pasado, da celebración do seu primeiro concurso internacional de vídeos. Un total de 16 institucións de nove países diferentes (Chile, Hungría, Lituania, Marrocos…) decidiron adherirse a este programa no que tamén participará a USC.
O concurso propón a elaboración de vídeos curtos (entre 1 minuto e medio e 2 minutos de duración) nos que se promocione a universidade do alumno e o Grupo Compostela da forma máis orixinal e creativa posible. O vídeo debe estar realizado en inglés ou con subtítulos e co logo do Grupo presente en todo momento. Ademais, non existen requirimentos técnicos de xeito que a peza pode ser gravada empregando un teléfono móbil ou webcam ata cámaras sofisticadas.
O estudante debe resultar primeiro gañador dun concurso interno na súa universidade. Tras superar esta fase, os estudantes pasarán a participar no concurso internacional do CGU, podendo gañar unha viaxe a Oulu (Finlandia) para asistir, no contexto da Asemblea Xeral do Grupo, á cerimonia de entrega dun certificado por parte dunha personalidade relevante dos medios audiovisuais. O seu vídeo terá tamén difusión internacional a través das plataformas de comunicación do Grupo Compostela e da súa reprodución en eventos internacionais nos que participe.