Estudantes da USC asistiron en Italia á segunda escola internacional da Rede Internacional de Doutoramento en Física de Partículas, Astrofísica e Cosmoloxía
Seis estudantes do Máster en Física nuclear e de partículas e as súas aplicacións tecnolóxicas e médicas e do Programa de doutoramento en Física nuclear e de partículas da USC participaron na cidade italiana de Udine na segunda escola internacional da Rede Internacional de Doutoramento en Física de Partículas, Astrofísica e Cosmoloxía (IDPASC), da que forma parte a USC a través do programa de doutoramento do seu Departamento de Física de Partículas. Durante a súa estadía en Italia coñeceuse que a USC será a sede en 2013 da terceira edición desta Escola Internacional, cuxa organización correrá a cargo dos profesores da USC Carlos Merino e Máximo Pló. A rede, constituída en 2010 e da que é coordinador principal o profesor Mário Pimenta, do Laboratorio de Instrumentación e Física Experimental de Partículas e do Instituto Superior Técnico da Universidade Técnica de Lisboa, reúne a varias universidades portuguesas, españolas, italianas e francesas e ao CERN. O seu obxectivo é a preparación de científicos nas súas áreas de estudo promovendo programas conxuntos de formación e reforzando a mobilidade de estudantes, docentes e investigadores das distintas institucións participantes. A rede está avalada pola supervisión dun comité científico internacional que conta con especialistas de prestixio internacional e do que forma parte o profesor Carlos Pajares Vales, catedrático da USC e representante español no Comité Científico do CERN. Liliana Cunha Apolinário, Manoel Rodríguez Calvo, Carlos Naya Rodríguez, Manoel Rodríguez-Moldes Díaz, Álvaro Magaña Rodríguez e Guillermo Torralba Elipe cualificaron de moi satisfactoria a estadía, na que fixeron presentacións notables da súa actividade de formación e de investigación e superaron os exames escritos a que foron sometidos ao final da escola. Un programa intenso O programa da escola cubriu unha gran parte dos temas máis fundamentais e actuais da Física de Partículas, da Astrofísica, e da Cosmoloxía, con cursos dedicados á mecánica cuántica, á teoría de campos e o modelo Standard, aos detectores de partículas, aos raois Gamma en astrofísica, á relatividade xeral e gravitación, á física do Large Hadron Collider (LHC) do CERN e a física de sabores e á adquisición de datos, á física de neutrinos. Ademais, organizáronse clases adicionais sobre aspectos culturais interdisciplinarios entre a física e outras ramas do saber.
Os cursos impartíronos especialistas de prestixio internacional como as profesoras e profesores Cesare Barbieri, Sergio Bertolucci, Francisco Botella, Julián Chela Flores, Alessandro de Angelis, Francesco Fidecaro, Laura Maraschi, Jorge Romao, Fabio Sauli ou Ezio Torassa.