Milagros Otero Parga ingresa na Academia Galega de Xurisprudencia e Lexislación

A catedrática de Filosofía do Dereito da Universidade de Santiago, Milagros Otero Parga, entra a formar parte da Academia Galega de Xurisprudencia e Lexislación como académica de número. O acto de toma de posesión celebrarase nos vindeiros meses. A profesora compostelá foi a primeira e única muller decana da Facultade de Dereito da USC e secretaria da comisión de doutoramento e terceiro ciclo. Conta no seu haber coa Medalla de Prata de Galicia e a Insignia de Oro da Universidade de Santiago e da Facultade de Dereito. Profesora convidada nalgunhas das máis prestixiosas universidades americanas en Bos Aires, Santiago de Chile, Sao Paulo e Montevideo, é asidua conferenciante de numerosas universidades mexicanas e asesora académica da Comisión de Dereitos Humanos e da Escola Xudicial do Estado de México, organismo que a nomeou magister honoris causa. Otero Parga é autora de 12 libros e de máis de 100 artigos publicados en revistas estatais e internacionais. Entre os seus libros figuran La Filosofía del Derecho Penal en la Universidad de Santiago 1800-1970; El poder y los ciudadanos; Alfredo Brañas, universitario; Valores Constitucionales. Introducción a la Filosofía del Derecho: Axiología jurídica; Las Fuentes del Derecho; Estudios de Derechos Humanos: Introducción a los Derechos Humanos, Objeción de conciencia y Ética judicial; A seguridade no Dereito; La responsabilidad social de la función juzgadora; Cuestiones de argumentación jurídica; Dignidad y solidaridad. Dos derechos fundamentales; Introducción a la Jurisprudencia histórica de Galicia; El sistema Nacional Mexicano de Educación Judicial; e Argumentos de la argumentación Jurídica.