Investigadores da Facultade de Medicina da USC patentan un sistema xenético para a identificación e clasificación de tumores tirodeos

Investigadores da Facultade de Medicina da USC acaban de presentar unha patente ante a Axencia Estadounidense de Protección Intelectual que conduce a novos métodos diagnósticos con base xenética que mellora a identificación e clasificación dos tumores foliculares de tiroides. Esta liña de investigación forma parte dun macroprograma denominado ‘Diana’ e no que participan investigadores da USC e da Fundación Pública Galega de Medicina Xenómica. Co financiamento da Fundación Pedro Barrié de la Maza, integran este proxecto diversos grupos do ámbito da farmacoloxía, a diagnose molecular e a medicina personalizada en distintas patoloxías, entre elas, os tumores tirodeos. Estes tumores son os máis comúns das denominadas neoplasias endocrinas sendo especialmente frecuentes no noroeste peninsular, onde poden chegar a alcanzar os 20 casos por cada 100.000 habitantes e ano. Ata agora, a clasificación da súa invasividade e malignidade realizábana patólogos a través de técnicas histolóxicas. Ademais, diversas publicacións conclúen que unicamente o 37 por cento dos tumores son correctamente clasificados mediante as técnicas presentes. O estudo, que emprega as últimas tecnoloxías disponibles en microarrays de expresión a escala xenómica, realizárono Carmen Pastoriza e Carmen Carneiro, coordinado polos profesores da Facultade de Medicina Fernando Domínguez e Anxo Vidal, todos eles investigadores do Departamento de Fisioloxía, en colaboración con José Manuel Cameselle, do Servizo de Anatomía Patolóxica. Anxo Vidal, investigador principal do proxecto, destaca que “o método desenvolvido baséase na análise xenética da expresión dun conxunto de catro xenes cuxo resultado permite distinguir entre tumores tiroideos malignos e benignos”. Además, engade o investigador, “usando por primeira vez a análise de variantes de expresión comprobamos que a relación entre dúas variantes da proteína resultante do xen FOLH1, unha forma curta e unha forma longa, pode ser igualmente utilizado para a diagnose e prognóstico dos carcinomas foliculares tiroideos”. No proxecto empregáronse mostras de preto dun centenar de pacientes do Complexo Hospitalario Universitario de Santiago de Compostela (CHUS), e os resultados foron corroborados en mostras procedentes do Instituto de Patoloxía Molecular e Inmunoloxía da Universidade de Porto (IPATIMUP). A patente presentada na Axencia Estadounidense de Protección Intelectual terá unha cobertura mundial e segundo o director científico do Programa Diana, o profesor Ángel Carracedo, trátase “do primeiro froito dunha longa serie de resultados prometedores consecuencia dos tres anos de intensa investigación desenvolvida no marco do Programa Diana e que sitúan a Galicia nunha situación privilexiada en investigación no ámbito da medicina personalizada e o diagnóstico xenético”.