Dous itinerarios prácticos sobre cuestións domésticas e un bloque teórico sobre as novas masculinidades integran os ‘Roteiros de Corresponsabilidade’

‘A igualdade non é cousa de mulleres. As novas masculinadades’ será o primeiro dos ‘Roteiros de corresponsabilidade’ que a Oficina de Igualdade da USC, xunto co Concello de Santiago, van organizar en forma de curso. No seu desenvolvemento prestarase atención á situación de homes e mulleres en diferentes ámbitos, a repercusión na convivencia e no emprego, medidas de concialiación vixentes, os micromachismos e as consecuencias das formas de violencia e a corresponsabilidade como forma de convivencia e conciliación. O prazo para formalizar a inscrición remata este venres 21, para o que será preciso remitir un correo electrónico co nome e apelidos e DNI ao enderezo oix [at] usc.es (oix[at]usc[dot]es). O bloque teórico, cunha carga de 16 horas, completarase con outros dous roteiros orientados dende unha perspectiva práctica. O primeiro baixo o lema ‘Itinerario doméstico’ e o segundo ‘ Itinerario técnico e de reparación’, ambos os dous de seis horas. O de ámbito doméstico tratará cuestións relativa á cociña nun nivel básico e á limpeza e orde. O programa complétase con nocións sobre elementos da instalación eléctrica na vivenda, electricidade básica e prevención de riscos. Impartidos por persoal do Concello Compostela, da Asociación de Hostalaría Compostelá e do CIFP Politécnico de Santiago, as tres primeiras xornadas celebraranse entre os días 24 e 26 de outubro na Aula do Centro de Estudos Avanzados da USC para tratar o bloque teórico. O roteiro de ‘Itinerario doméstico’ terá lugar os días 2 e 3 de novembro na Aula de Formación da Asociación Hostaleira Compostela rematando co terceiro módulo, do 7 ao 9 de novembro na Aula do CIFP Politécnico.

En total o curso, ten unha duración de 30 horas e a participación nas distintas sesións será validable por un crédito de libre elección.