Estudantes do Master de Arte da USC comisarían en Santiago unha exposición do artista portugués André Guedes

O artista portugués André Guedes retorna a Santiago anos despois da súa provocadora intervención urbana coa que trasladou ao Obradoiro o monumento homenaxe a Montero Ríos que descansa habitualmente en Mazarelos. Guedes volve agora forzar á reflexión, nesta ocasión sobre a necesidade de que o individuo participe nos procesos e prácticas de construción colectiva, mantendo o seu lugar e a súa consciencia como suxeito. A mostra Hoxe comezamos a falar -unha frase aberta extraída das recentes protestas do pasado mes de marzo na Praza dos Aliados do Porto- forma parte das actividades académicas da cuarta edición do Máster en Arte, Museoloxía e Crítica Contemporáneas da USC de maneira que son os seus estudantes os que a comisarían co aclara intención de convidar a reflexionar sobre a acción humana (individual) no momento histórico presente (colectivo). Dúas seccións directamente asociadas e implicadas entre si conforman a exposición no Colexio de Fonseca. Por unha banda, unha escolma de obxectos e figurinos que pertencen á Aula de Teatro da USC, e, por outra, a teatralización de textos e manifestos de Voltaire, Marinetti e Picabia, entre outros, que serán interpretados por actores das diferentes compañías de teatro universitarias. Guedes deseña a escenografía colocando os obxectos en peañas sobre tarimas deixando que estes actúen e formen parte da performance por medio da manipulación que farán os actores.

Con esta nova produción –na que o carácter performativo, baseado na transmisión da palabra, volve estar presente na obra do artista portugués- hai tamén unha aproximación ao teatro como importante medio de crítica social.