Representantes do SERVIMAV asisten en Albacete a un encontro de servizos audiovisuais universitarios sobre contidos en rede

Unha representación do Servizo de Medios Audiovisuais da USC (SERVIMAV) encabezada polo director do servizo, Ángel Fagilde, asistiu estes días en Albacete ás xornadas Anuais dos Servizos Audiovisuais das Universidades Españolas (SAVUES). Déronse cita neste encontro preto de setenta profesionais procedentes de máis de 20 universidades españolas e arxentinas. Estes dous días de traballo conxunto permitiu achegar novas ideas e proxectos á coprodución de contidos audiovisuais universitarios e facer un seguimento do proxecto sobre a plataforma de contidos e repositorios audiovisuais no ámbito das universidades españolas, coñecendo así as iniciativas máis relevantes no campo audiovisual levadas a cabo polas institucións universitarias.

As xornadas SAVUES achegaron aos asistentes detalles relativos aos aspectos fundamentais sobre a regulación dos dereitos de autor, de imaxe, e de explotación da difusión de contidos audiovisuais en rede, así como as bases da catalogación dos contedores audiovisuais, tamén en rede, de cara a establecer estratexias de xestión para facilitar o seu uso compartido a través das redes corporativas universitarias. Tamén se intercambiaron experiencias respecto de novos formatos en materiais audiovisuais e novas formas de difundilos a través de dispositivos móbiles.