O Orfeón 'Terra a nosa' ofrece un recital en Lugo

O ciclo de música clásica ‘Músicas a carón da Mosqueira’, organizado no marco do convenio Lugo Cultural, continúa o vindeiro 26 de abril ás 20:30 horas cun concerto do Orfeón ‘Terra a nosa’ no Círculo das Artes da capital luguesa.
Baixo a dirección de Miro Moreira, Jordi Ricard (barítono), Aída López (soprano), Juan Manuel Varela (piano), Nicasio Gradaille (piano) interpretarán o réquiem alemán de Johannes Brahms na súa versión con pianos, que se estreou en Londres no ano 1871 e, en grande medida, axudou a asentar a reputación internacional do compositor.
O programa de ‘Músicas a carón da Mosqueira’ continuará o día 10 de xuño coa actuación da Orquestra Rogelio Groba e rematará o 13 de decembro coa presentación do novo disco do coro Solo Voces, un traballo que dedican integramente á cidade de Lugo facendo unha panorámica da música vocal composta na provincia nos dous últimos séculos. Todos os concertos teñen entrada gratuíta.