Preséntase en Santiago o 8º Encontro Universitario de Danza Contemporánea da USC

Compañías de Porto Rico, Madrid, A Coruña, Santiago de Compostela e Lugo participarán este ano na oitava edición do Encontro Universitario de Danza Contemporánea da USC, que ten como finalidade favorecer o intercambio cultural a través das distintas propostas coreográficas das Universidades.
Entre os días 26 e 29 de abril, sete compañías porán en escena as súas coreografías en Santiago e Lugo, en espazos tan especiais como a Igrexa da Universidade ou a Sala de Mosaicos do Museo Provincial de Lugo. Haberá tamén actuacións no Campus Vida de Compostela e no marco da celebración -o xoves 29- do Día Internacional da Danza na rúa do Bispo Aguirre ( Lugo).
O Encontro presentarase este mércores, 21 de abril, nunha rolda de prensa a celebrar ás 11:00 horas na Sala de Prensa de Fonseca e na que participarán a vicerreitora de Cultura, Elvira Fidalgo, e o director do Espazo de Danza da USC e responsable do encontro, Juan Carlos Zahera.