A USC colabora no desenvolvemento dun software para avaliar o rendemento dos computadores

Un equipo de investigadores do Centro de Supercomputación de Galicia (CESGA), do Grupo de Arquitectura de Computadores da Universidade de Santiago de Compostela e do Grupo de Arquitectura de Computadores da Universidade da Coruña desenvolveu a primeira suite de microbenchmarking para a linguaxe de programación paralela Unified Paralle l C (UPC ) .
O software, bautizado como UPC Operations Microbenchmarking Suite (UOMS), será liberado para o seu uso pola comunidade investigadora e servirá como banco de probas para comprobar o rendemento das implementacións da linguaxe UPC. A nova ferramenta permite aos avaliadores comprobar o rendemento da execución dunha serie de operacións para unha ampla gama de tamaños de problema e para configuracións de sistemas actuais e futuros.
Este código é un desenvolvemento que forma parte do proxecto ‘Improving UPC Usability and Performance in Constellation Systems: Implementation/Extensions of UPC Libraries’ no que colaboran o propio CESGA, Hewlett-Packard e as Universidades de Santiago e A Coruña.
O traballo introduce unha suite que pretende cubrir a falta de ferramentas para avaliación de implementacións de compiladores da linguaxe UPC. As linguaxes PGAS (Partitioned Global Address Space) como UPC, debido á súa xuventude, carecen dalgunhas ferramentas e librarías necesarias. Así, UOMS aborda esa falla. Co desenvolvemento e liberación de UOMS a linguaxe UPC está preparada para afrontar o próximo paso na súa evolución.
Linguaxes cada vez máis importantesOs paradigmas tradicionais son cada vez menos prácticos para a programación das actuais plataformas de HPC. A introdución de sistemas de varios núcleos representa un cambio de arquitectura significativo no que as formas habituais de paso de mensaxes non encaixan de forma natural. Por iso está a aumentar o interese por novas linguaxes que sexan capaces de superar a complexidade e os problemas de programación das actuais bibliotecas e linguaxes paralelas. É por esta razón que as linguaxes PGAS, e en particular o UPC, son cada vez máis importantes na programación paralela actual. Tanto é así que a industria está a desenvolver as súas propias implementacións, e a investigación académica proporciona varios compiladores e "runtimes" de código aberto a desenvolvedores de todo o mundo.
O código liberado presentarase no International Supercomputing Conference 2010, a conferencia de maior prestixio en Europa neste campo, que se celebra o próximo mes de xuño en Hamburgo, e está dispoñible na web upc.cesga.es.