Tres campionatos da USC no Campus de Santiago e dous en Lugo para a vindeira semana

Organizados pola Área de Deportes, os campionatos da USC de tenis, karate, tae kwon-do, tenis de mesa e esgrima celebraranse para a vindeira semana nas instalacións deportivas do Campus de Lugo e Santiago.
A primeira das competicións será de tenis e terá lugar o luns 3 ás 20:30 horas nas Pistas Universitarias de Compostela. Xa o mércores 5 ás 16:00 horas dará comezo o campionato de karate na sala de Artes Marciais en Santiago e o de tenis de mesa desenvolverase o venres 7 ás 10:00 horas no Anexo do Pazo dos Deportes de Lugo.
O Pavillón lucense Santiago Cajigal e a sala de Artes Marciais compostelá acollerán o sábado 8 os encontros de esgrima e de tae kwon-do, ás 10:00 e 13:00 horas, respectivamente.
Campionato Galego UniversitarioPor outra banda, deportistas da USC participarán o mércores 5 e xoves 6 en Vigo no Campionato Galego Universitario de Deportes Colectivos. Asistirán equipos de fútbol masculino, fútbol 7 feminino, fútbol sala masculino e feminino, balonmán masculino e feminino, baloncesto masculino e feminino e voleibol masculino e feminino.