Eclipse total de lúa na madrugada do mércores ao xoves

Na madrugada do mércores 20 ao xoves 21 producirase unha eclipse total de Lúa que será visible na Península Ibérica “onde as condicións meteorolóxicas o permitan”, matiza o director do Observatorio Astronómico Ramón María Aller da USC, José Angel Docobo.
O fenómeno comezará á 1:35 hora peninsular, momento no que o satélite tocará o cono de penumbra proxectado pola Terra. A eclipse parcial iniciarase ás 2:43, mentres que a totalidade se prolongará dende as 4:01 ata as 4:52 horas. O último contacto coa sombra será ás 6:09 horas, e finalmente a eclipse penumbral, e con el o fenómeno no seu conxunto, rematará ás 7:17 horas.
Contrariamente ás eclipses de Sol, nas de Lúa non é necesario protexer a vista para a súa observación, xa sexa a simple vista, con prismáticos ou telescopio.
Segundo informan os responsables do observatorio compostelán, este ano será posible observar outro eclipse de Lúa dende España, neste caso parcial, que terá lugar o 16 de agosto.