Rematan as xornadas de software libre da Aula TIC-Pemes cunha sesión sobre a plataforma eGroupWare

Este venres 16 rematarán as primeiras ‘Xornadas de aplicacións web de software libre para asociacións empresariais’, organizadas en Lugo pola Aula TIC-Pemes da Universidade de Santiago, e que nesta ocasión celebra a súa quinta sesión centrada no traballo en grupo e xestión de proxectos con eGroupWare.
A sesión constará novamente dunha conferencia de 45 minutos dirixida a directivos e xerentes de asociacións empresariais e dun obradoiro de dúas horas de introducción no uso da plataforma web de traballo en grupo, xestión de proxectos e contidos dirixido aos informáticos e persoal de administración das asociacións.
A conferencia corresponderalle ao profesor da Universidade da Coruña Marcos Vizcaíno González, que exporá as múltiples funcionalidades da plataforma eGroupWare, de gran utilidade para a xestión da intelixencia colectiva e do coñecemento, actividades, contactos ou eventos.
A xornada desenvolverase de 17:00 a 20:00 horas na Facultade de Administración e Dirección de Empresas de Lugo. A conferencia será na Aula 3 e a práctica na aula de informática número 1.
Con esta sesión finalizan estas primeiras xornadas, destinadas a analizar un conxunto de plataformas web de software libre, dunha gran utilidade para unha asociación empresarial, público obxectivo ás que foron dirixidas.