A USC incrementa neste curso o número total de matriculados en medio milleiro de estudantes

A Universidade de Santiago de Compostela incrementa neste curso académico o seu número total de alumnos con respecto ao pasado ano por primeira vez na década, “rachando cunha tendencia común no norte do país de descenso no número de matriculados”, indicou o reitor compostelán Senén Barro nun encontro cos medios de comunicación no que deu conta dos datos de matrícula na USC no presente curso.
A día 5 deste mes de novembro a cifra ascendía a 28.844, mentres que na mesma data do ano anterior era de 28.309. Deste total, 5.317 cursan estudos no Campus de Lugo e 23.623 no de Compostela. Continuando coa tendencia de anos anteriores, a porcentaxe de mulleres segue a ser superior, co 64,8 por cento (18.684) das matriculas. Estes datos indican que coas incorporacións que se produzan ao longo do curso (traslados de expedientes, matrícula por convenios Erasmus, Sicue,...) o número total ascenderá por riba dos 30.000 estudantes.
Na presentación, o reitor estivo acompañado polo vicerreitor de Oferta Docente e Espazo Europeo de Educación Superior, Máximo Pló; a secretaria xeral, Isabel Garcia-Rodeja; e o vicexerente de Xestión Académica, Francisco Colomer.
Os esforzos realizados por incorporar as novas tecnoloxías a esta parte da xestión universitaria afiánzanse, xa que oito de cada dez alumnos (23.530) formalizaron o trámite de ingreso aos estudos superiores utilizando Internet, mentres que o ano pasado elixiron esta opción 13.693.
Os alumnos matriculados en 1º durante este curso ascenderon a 5.222, mentres que o pasado ano nas mesmas datas as cifras situábanse en 4.631. As provincias que máis destes alumnos proporcionan son as da Coruña (1.787) e Pontevedra (1.058), seguidos de Lugo (835) e Ourense (367). Xa de fóra de Galicia, na USC cursan estudos alumnos da maioría das provincias españolas e un 15,2 por cento de sesenta países de todo o mundo, particularmente de Portugal (115), Italia (99), Suíza (84), Brasil (82), Polonia (56), Alemaña (53), Francia (44), México (43) ou Venezuela (41).
Titulacións con límite de prazasTodas as titulacións que a USC ofertaba con límite de prazas cubriron a súa oferta, situándose Medicina, Comunicación Audiovisual, Odontoloxía e Xornalismo entre as de maior nota de corte nas probas de acceso á Universidade. Ademais, e dentro da converxencia co Espazo Europeo de Educación Superior, a USC puxo en marcha este ano dous títulos de grao, en Ciencia Política e da Administración e o de Matemáticas, con 73 e 80 matriculados respectivamente.
SelectividadeDos 310 estudantes que obtiveron unha nota na Selectividade igual ou superior a 9, matriculáronse en titulacións da USC máis da metade, un total de 175, sendo a Facultade de Medicina e Odontoloxía a que máis destes alumnos capta, así como diversos centros de Santiago e Lugo, destacando a Escola Técnica Superior de Enxeñaría, Ciencias da Comunicación, Filoloxía, Enfermaría, Ciencias da Educación, Farmacia, Dereito, Física ou Matemáticas.
Por centrosOs centros con maior número de alumnos, seguindo a tendencia dos últimos anos son os de Ciencias Económicas con practicamente tres mil estudantes, Medicina e Odontoloxía con 2.471, Ciencias da Educación con 2.394, Dereito con 1.856, Escola Politécnica Superior de Lugo con 1.740, Psicoloxía con 1.619, Farmacia con 1.486, Xeografía e Historia con 1.411, Filoloxía con 1.179 e Bioloxía con 1.118.
POPNo apartado dos Programas Oficiais de Posgrao (POP), a USC contabiliza 491 estudantes de primeira matrícula en POP a tempo completo, fronte aos 220 do pasado ano, que é preciso sumar aos 344 que continúan estudos nesta mesma modalidade e aos 18 a tempo parcial.
Terceiro CicloTendencia ascendente tamén é a que se pode observar nos estudos de 3º Ciclo, onde se matricularon por primeira vez 584 estudantes, por 391 do pasado ano, e 773 que continúan os seus estudos, fronte aos 524 do curso 2007-2008. Neste senso, na etapa de tese figuran outros 1.799 alumnos que habería que engadir ás cifras totais de matriculados na USC no presente curso.