O xurado do IX Premio Aresa de Desenvolvemento Rural emite o seu ditame este martes en Lugo

O reitor da Universidade de Santiago, Senén Barro, e mailo presidente de Aresa, Álvaro Rodríguez Eiras, darán a coñecer en Lugo ao gañador do IX Premio Aresa de Desenvolvemento Rural que outorgan conxuntamente a USC e mailo grupo empresarial. O xurado fará pública a súa decisión no decurso dun acto que terá lugar ás 12:30 horas no Vicerreitorado. A entrega do galardón celebrarase a primeiros do vindeiro ano.
O Premio Aresa foi concibido para incentivar a investigación e o desenvolvemento, así como iniciativas empresariais anovadoras, na agricultura e na gandería de Galicia. Recoñece traxectorias persoais, empresariais ou institucionais na área agrogandeira como elementos fundamentais para mellorar a calidade de vida e o benestar das persoas no medio rural galego. Organizado pola Universidade de Santiago e Aresa, compañía lucense que opera no sector dos fertilizantes e produtos gandeiros en España e Portugal, o gañador percibirá dez mil euros, suma que o converte no galardón mellor dotado de cantos na súa especialidade se outorgan en Galicia.
O xurado da novena edición está formado polos reitores das universidades de Santiago, Senén Barro Ameneiro, e de Córdoba, José Manuel Roldán Nogueras; polo vicerreitor do Campus de Lugo, Carlos Herrero Latorre; o presidente de Aresa, Álvaro Rodríguez Eiras; e Juan Pardo San Pedro, presidente da Asociación Comercial Española de Fertilizantes.